सिन्धुपाल्चोकको हेलम्बु गाउँपालिका अध्यक्ष निमाग्याल्जेन शेर्पाले केन्द्रिय बजेट ल्याएर गाउँको विकास गर्ने अवधारणा ल्याएका छन् । पालिकामा प्राप्तहुने रकमबाट मात्रै हेलम्बुको विकास सम्भव नहुनेभएपछि अध्यक्षले माथिल्ला निकायमा पहुँच बढाएर बजेट ल्याउँदै गाउँमा ठुला आयोजना सञ्चालन गर्न थालेका हुन् ।
अध्यक्ष शेर्पाको पहलमा हेलम्बुमा करोडौंका पूर्वाधार विकासका आयोजना सञ्चालनमा छन् । पालिकाबाट योजना माग भइ बजेट निर्माणको चरणमा समावेश भएका आयोजनामा अहिले स्रोत सूनिश्चितता गराएर सहमति लिँदै बजेट ल्याउन शेर्पा सफल भएका छन् ।
अर्थमन्त्रालयबाट मेलम्ची बजार मेलम्ची हेडवक्स कम्पोनेन्ट नं. २२६ सिन्धुपाल्चोक शिर्षकमा १५ करोड बजेटको स्रोत सुनिश्चितता गरेर सहमति दिएको छ । हेलम्बु सडक खण्ड सुधारसहितको यो योजना सिन्धुपाल्चोकको गौरवको आयोजनाका रुपमा सञ्चालन हुनेछ ।
यसअघि पालिका भित्रका सबै सडक कालोपत्रे गर्ने योजना अन्तरगत चनौटे थापाटारदेखि घोप्टेघ्याङसम्म ग्रावेल र पिचका लागि प्रदेश नीति तथा योजना आयोगबाट बहुवर्षिय आयोजना अन्तर्गत यो सडक योजना स्वीकृत भएर २७ करोड ९८ लाख १३ हजार बजेट विनियोजन भएको थियो ।
अन्य निर्माणाधिन र नयाँ आयोजनामा समेत शेर्पाले संघ तथा प्रदेश सरकारबाट करोडौंका योजना हेलम्बु ल्याएका छन् ।
हेलम्बुको समृद्धिका लागि पालिकामा नियमित प्राप्त हुने स्रोत मात्रै पर्याप्त नभएकाले आवद्यिक योजना निर्माण गरेर हरेक आयोजनाको विस्तृत परियोजना प्रतिवेदन डिपिआर बनाउँदै अर्थ मन्त्रालय, भौतिक पूर्वाधार मन्त्रालय र अन्य निकायमा योजना पेश गरेर बजेट माग गर्ने गरिएको गाउँपालिका अध्यक्ष शेर्पाले अनलाइन सरोकारसँग बताए । केन्द्रबाट बजेट ल्याएर ठुला आयोजना सञ्चालन गर्ने र पालिकाको सिमित स्रोतबाट नागरिकको माग र आवश्यकताका आधारमा साना मझौला कार्यक्रम सञ्चालन गरिने उनको भनाई छ ।
पूर्वाधार निर्माण र पर्यटन विकासलाई प्राथमिकता दिएको हेलम्बुमा स्थानीय जनप्रतिनिधिकै नेतृत्वमा पछिल्लो केही वर्षयता विकासले गति लिएको छ ।
हेलम्बुका अध्यक्ष शेर्पा माथिल्लो निकायमा पहुँच राख्ने र जिल्लाको विकासमा बजेट ल्याउन सक्ने नेताका रुपमा परिचित छन् ।
