२०८१, ६ असार बुधबार | Wed Jun 19 2024

मौसम अपडेट

नेपाली पात्रो

विदेशी विनिमय दर अपडेट

राशिफल अपडेट

सुन चाँदी दर अपडेट

Title

बूढीगंगामा बेलिब्रिज अलपत्र



बाजुराको बडिमालिका नगरपालिकाअन्तर्गत साँफे–मार्तडी सडक खण्डको जडाङ्गमा रहेको बेलिब्रिज नदीमै थन्किएको छ । पक्की पुल निर्माण भएको तीन वर्ष पुग्न लाग्दासम्म पनि अन्य ठाउँमा सार्न पहल नहुँदा नदीमै पुल थन्किएको हो ।

जडाङ्गको बूढीगंगा नदीमा दुईवटा गाडी गुड्ने पुल छन् । तर जिल्लाका अरू सडकखण्डमा भने एउटा पुल पनि निर्माण हुन सकेको छैन । बाजुराको मार्तडी–कोल्टी सडकखण्डका तीन ठूला नदी र काँडा–आटिचौर–मार्तडी जोडने सडक खण्डको भौनेरामा पुल निर्माण नहुँदा वर्षातमा यातायात पूर्ण रूपमा ठप्प हुन्छ ।

जिल्ला तहमा बेलिब्रिज अर्को ठाउँमा सारिनुपर्ने स्थानीयले माग राखे पनि अन्यत्र लैजाने अहिलेसम्म कुनै योजना बनेको छैन । उक्त पुल सडक विभागको हो । सडक विभागसँग कता सार्ने भन्ने ठोस योजना नहुँदा बेलिब्रिज नदीमै थन्किएको प्रमुख जिल्ला अधिकारी भीमकान्त पौडेलले बताए । अन्यत्र सारेको भए त्यहाँका बासिन्दा लाभान्वित हुने थिए भन्दै उनले आफ्नो ठाउँबाट यसका लागि पहल भइरहेको बताए ।

बाजुराका धेरै नदीमा यस्तो पुल आवश्यक छ । मार्तडी कोल्टी सडकअन्तर्गत अनाइखोलाले एक वर्ष पहिला ट्याक्टर बगाउँदा चालक हालसम्म पनि बेपत्ता छन् । खोलामा पुल नहुँदा रातिको समयमा ट्याक्टर तार्न खोज्दा बाढीले बगाएको थियो ।

बडीमालिका नगरपालिकाका नगरप्रमुख अम्मर खड्काले भने बूढीगंगा नदीमा रहेको बेलिब्रिज अन्यत्र सार्न पहल भइरहेको बताए । उनले भने, ‘तर संघीय सरकारको बेलिब्रिज भएकाले सडक विभागले निर्णय गर्न नसक्दा यो अलपत्र हुन पुगेको छ ।’

बेलिब्रिज निर्माणदेखि स्थापना सम्ममा १० करोडभन्दा बढी खर्च हुने विभागको भनाइ छ । यसरी करोडौं रुपैयाँ पर्ने बेलिब्रिज अहिले प्रयोगहीन अवस्थामा छ । यसलाई अन्यत्र सार्नेमा कसैको ध्यान नगएको स्थानीयको भनाइ छ । बाजुराबाट निर्वाचित संघीय र प्रदेश सांसदले यसलाई अन्यत्र सार्न पहल गरिरहेको बताए पनि कार्यान्वयन हुन सकेको छैन ।

प्रकाशित मिति : २०८१, २१ जेठ सोमबार ००:००  ३ : ५६ बजे