नेकपा एमाले सिद्धिचरण नगर कमिटी अध्यक्षमा युवा नेता प्रकाश कट्वाल निर्विरोध निर्वाचित भएका छन् । मंगलबार सम्पन्न दोस्रो नगर अधिवेशनबाट कट्वालको अध्यक्षतामा सर्वसम्मत नगर कमिटी गठन गरिएको हो ।
अधिवेशनबाट उपाध्यक्षमा अनुप श्रेष्ठ, सचिवमा मनोज मगर, उप–सचिव दुई पदमा रामकुमार श्रेष्ठ र उर्मिला धमला (बास्तोला) निर्विरोध निर्वाचित भएका छन् ।
अधिवेशनले ४८ सदस्यीय नगरकमिटी गठन गरेको छ भने बाँकी ५ जना मनोनयन गरिने छ ।
अधिवेशनलाई नेकपा एमाले केन्द्रीय सदस्य यज्ञराज सुनुवार, प्रदेश कमिटी सचिवालय सदस्य अम्बिरबाबु गुरुङ र जिल्ला कमिटी अध्यक्ष जिवी खड्कालगायतले सम्बोधन गरेका थिए ।
सिद्धिचरण नगरपालिकाको अधिवेशन सम्पन्न गर्ने जिम्मेवारी जिल्ला कमिटी उपसचिव राजिव कट्वाललाई तोकिएको थियो ।
जिल्लाका ८ मध्ये मोलुङ र मानेभञ्ज्याङ बाहेक अरु ६ पालिकामा सर्वसम्मत नेतृत्व चयन गर्दै पालिका अधिवेशन सकिएको एमालेले जनाएको छ ।
