विनयी त्रिवेणी गाउँपालिकाले पुष्प खेती प्रवद्र्धन गर्ने नीति लिएको छ । गाउँपालिकामा फुलको माग पूर्ती गर्दै किसानलाई आत्मनिर्भर बनाउने उद्देश्यले पुष्प खेती तथा व्यवसाय प्रवद्र्धन गर्ने नीति लिएको हो ।
फुलखेती गर्ने किसानालाई उत्पादनमा अनुदान दिने र उत्पादीत फुलको बजारीकरणका लागि समेत पहल गरेर व्यवसायिक पुष्प व्यवसायमा किसानलाई आकर्षित गराउने नीति लिइएको गाउँपालिका अध्यक्ष घनश्याम गिरीले बताए । व्यवसायिक कृषि मार्फत किसानलाई आत्मनिर्भर बनाउन र कृषिबाटै पालिकाको आर्थिक समृद्धि हासिल गर्न नीतिगत पहल भईरहेको अध्यक्ष गिरीको भनाई छ ।
बजारमा पाइने खादा मालाको प्रयोग बढिरहेको र गाउँघरमा फुल रोप्ने चलन हराइरहेको अवस्थामा फुल उत्पादनको सम्भावना अध्ययन गरेर पालिकाले किसान लक्षित कार्यक्रम अघि सारेको हो ।
व्यवसायिक पुष्प व्यवसायका लागि व्यवसायिक कृषि फर्म, कम्पनी, कृषक समूह र सहकारीलाई गाउँपालिकाले अनुदान दिने भएको छ । पालिकाले १५ दिन भित्र प्रस्ताव सहित आवश्यक कागजातहरु गाउँपालिकाको कृषि शाखामा पेश गर्न सूचना जारी गरेको छ ।
फुल खेती प्रवद्र्धन कार्यक्रम अन्तरगत कृषि सहकारी, कृषक समूहको हकमा न्यूनतम ५ कठ्ठा क्षेत्रफलमा र कृषि फर्मको हकमा न्यूनमत ३ कठ्ठा क्षेत्रफलमा खेती गरेमा सयपत्री फुलको बिउ, बिरुवा, प्लाष्टिक मल्चिङ, नर्सरी ट्रे, पिटमस विषदी साथै अन्य आवश्यक सामाग्री सहयोग गरिने गाउँपालिकाले जनाएको छ ।
प्रस्तावसाथ तोकिए बमोजिमको ढाचाँको निवेदन सहितको प्रस्ताव, संस्थाको दर्ता/ नविकरण प्रमाणपत्र, कृषि सहकारी/ कृषक समूहको हकमा संस्था सञ्चालक समितिको कार्यक्रम मागको बैठक निर्णय र वडा कार्यालय सिफारिस पेश गर्नुपर्ने छ ।
![](https://onlinesarokar.com/wp-content/uploads/2024/07/452374463_880387370790080_4280794552005213898_n.jpg)