चक्रपथ अर्थात रिङरोड ठुलो र छरिएको भुगोललाई एकैपटक जोड्ने सडकमार्ग हो । छोटो दुरीबाट एकै फन्कोमा सबै क्षेत्रमा पुग्न सकिने चक्रपथ विगतमा सहरमा मात्रै प्रचलित विकास मानिन्थ्यो । अहिले नेपालका दुर्गम गाउँहरुमा समेत चक्रपथको अवधारणा अघि बढ्न थालेको छ ।
कालिकोटको तिलागुफा नगरपालिकाले नगरभित्र चक्रपथ निर्माणको नीति लिएको छ । नगरपालिकाका सबै ११ वटा वडालाई छोटो दुरीबाट गाउँ देखि सहर र एकठाउँ बाट अर्को ठाउँ जोड्नलाई चक्रपथ निर्माणको नीति ल्याइएको तिलागुफा नगरपालिकाका प्रमुख शंकरप्रसाद उपाध्यायले बताए । नगरको गौरवको योजनाका रुपमा सुरु हुने यो योजना सम्पन्न गर्न संघ र प्रदेश सरकारसँग बजेट माग गरिने नगरप्रमुख उपाध्यायको भनाई छ ।
तिलागुफाको चालु आर्थिक वर्षको नीति तथा कार्यक्रमको पूर्वाधार विकास अन्तरगत ४ नम्बर बुँदामा ‘नगरको गौरवको आयोजनाका रुपमा ११ वटै वडा जोड्ने गरी चक्रपथ निर्माण गरिनेछ’ भन्ने उल्लेख गरिएको छ ।
पर्यटनको प्रचुर सम्भावना भएको तिलागुफा नगरपालिकाले नगरका सडकसहितका पूर्वाधार विकासलाई पर्यटनसँग जोड्ने गरेको छ ।
प्राकृतिक, धार्मीक एवं एतिहासिक तिलागुफामा बन्ने चक्रथप आयोजना र पालिका भित्रका सडक मर्मत तथा स्तरोन्नतीको कामले नगरको समग्र विकासमा टेवा पुग्ने नगरपालिकाले जनाएको छ ।
तिलागुफाको नयाँ नीति कार्यक्रमा नगरस्तरीय सडक गुरु योजनालाई पूर्णता दिई कार्यान्वय गरिने, नगरभित्रका ग्रामिण कृषि सडकहरुलाई निरन्तरता दिँदै गाल्जे बालीचौर छाप्रे सडकको ठेक्का प्रकृयालाई तत्काल अघि बढाउने विषयले प्राथमिकता पाएको छ ।
विकासले बद्लिएको तीलागुफा भिडियाेमा हेर्नुहाेस्
