संयुक्त अरब इमिरेट्स युएईमा मृत्युदण्डको सजाय तोकिएका भुवन श्रेष्ठ सकुशल स्वदेश फर्किएका छन् । बिरामी भएका साथीलाई अस्पताल लैजाने क्रममा निधन भएको घटनामा मृत्युदण्डको सजाय सुनाइएका ओखलढुंगाको चिशंखुगढी ३ का श्रेष्ठ ५० लाख ब्लडमनी बुझाएर स्वदेश फर्किएका हुन् ।
श्रेष्ठलाई सन् २०१९ को जुन ३ मा मध्यविन्दु नगरपालिका ११ नवलपुरका बाबुराम आलेमगरको हत्या आरोपमा पक्राउ गरी जेल चलान गरिएको थियो ।
सोही हत्या आरोपमा नेत्रवती गाउँपालिका– ४ धादिङका पहलमान थापा पनि संलग्न भएको भन्दै युएईको उपल्लो अदालतले आजीवन कारावास हुँदै ब्लडमनी बुझाउनुपर्ने फैसला गरेको थियो । पहलमान अहिलेपनि युएईको सारजाह जेलमा हुनुहुन्छ ।
हत्या आरोप लागेका भुवन र पहलमानलाई प्रतिव्यक्ति १ लाख ५० हजार युएई दिराम (जम्मा ३ लाख) दिराम पीडित परिवारलाई नेपालमा दिने तथा ५ वर्षको जेल सजाय सारजाहको उपल्लो अदालतले फैसला सुनाएको थियो ।
जेल सजाय भुक्तान गरिरहेका उनीहरूको उद्धारका लागि नेपालमा अभियान सञ्चालन गरी आर्थिक संकलन गरी पीडित परिवारलाई बुझाएपछि भुवन बुधबार साँझ सारजाह रिहाई भई राती एयर अरबिया मार्फत नेपाल फर्किएका हुन् ।
५ वर्षदेखि युएईको सारजाह जेलमा कैदी जीवन बिताइरहेका श्रेष्ठ र थापालाई बचाउन नेपालमा रकम संकलन अभियान चलाइएको थियो । भुवनका बुवा यमनारायण श्रेष्ठको याचनामा ओखलढुंगा जिल्लाबासीले सुरु गरेको सहयोग संकलन अभियानमा देश विदेशबाट रकम जम्मा भएको थियो ।
अदालतले फैसलामा तोके अनुसारको रकम पीडित परिवारलाई बुझाएपछि मृत्युदण्डको सजाय तोकिएका श्रेष्ठ र थापाको उद्धारको पहल सुरु भएको थियो ।
भुवन नेपाल फर्किएपनि पहलमान अझै जेलमै छन् । कानूनी प्रकृया पुरा गरेर उनलाई पनि नेपाल फर्काउने पहल भईरहेको छ ।
आफ्नो श्रीमान बाबुरामको हत्या हुँदा उनकी श्रीमती नरिमा आलेमगर पनि बैदेशिक रोजगारीकै क्रममा युएईमा भएको र उनैले किटानी जारीसहित अनुसन्धानका लागि निवेदन दिएकी थिइन् । सोही उजुरीका आधारमा दुबै जनालाई पक्राउ गरी अनुसन्धान गरी अदालतमा सुनुवाई भएको थियो ।
नेपाली दुतावास आबुधाबीले पीडितको तर्फबाट बहस पैरवी गर्न दुतावासका स्थानीय जनसम्पर्क अधिकृत इरफान आलमलाई खटाएको थियो ।
सबै प्रकृया पुरा गरेर नेपाल फर्किएका भुवनलाई आफन्त र जिल्लाबासीले भव्य स्वागत गरेका छन् । नेपाल फर्किएपछि भुवनले आफुहरुलाई उद्धारका लागि पहल गर्ने रकम संकलन गर्ने सबैलाई धन्यवाद दिएका छन् ।
भुवनलाई काठमाडौंमा स्वागत गर्दै ओखलढुंगाका सांसद एवं राज्य व्यवस्था तथा सुशासन समितिका सभापति रामहरि खतिवडाले उनको उद्धारमा ऐक्यवद्धता जनाउने सबैलाई धन्यवाद दिँदै भुवन बचाउ अभियानले पूर्णता पाएको बताए । खतिवडाले श्रेष्ठ र थापाको उद्धारका लागि सदनमा आवाज उठाएका थिए ।
