बाग्लुङको निसीखोला गाउँपालिकाले कृषि मार्फत समृद्धि खोज्दै किसानलाई आत्मनिर्भर बनाउने नीति लिएको छ । कृषि उत्पादन र पशुपालनको प्रचुर सम्भावना भएको निसीखोलाले निर्वाहमुखी खेतीलाई व्यवसायिक बनाउने र आधुनिक खेतीको विकास गरेर गाउँमै किसानलाई आत्मनिर्भर बनाउने नीति अघि सारेको हो ।
निसीखोलाका नागरिकको मुख्य पेशा कृषि र पशुुपालन हो । सबै वडामा पशुवस्तु चरिचरणका लागि प्रसस्तै खुला जमिन छ । खेतीपातीको सम्भावना पनि उत्तिकै छ ।
बागलुङ जिल्लामै सबैभन्दा राम्रो स्याउ उत्पादन हुने क्षेत्र निसीखोलाको वडा नम्बर ५ निसेलढोर, वडानम्बर २ को अर्नाकोट हो । निसीखोलामा वर्षौं अगाडिदेखि नै व्यावसायिक स्याउ उत्पादन हुँदै आएको छ । गाउँपालिकाले अहिले थप स्याउखेती विस्तार गरिरहेको छ ।
निसीखोला मौरीको महका लागि निकै प्रख्यात छ ।
बोयर बोका वितरण गरिरहेको निसीखोलाले गाउँलाई आलु र मासुमा आत्मनिर्भर बनाएको छ ।
दलहन र तेलहनबाली प्रसस्तै हुने यस क्षेत्रमा परम्परागत निर्वाहमुखी खेतीलाई आधुनिकिकरण गरेर व्यवसायिक बनाउन पकेट विकासका कार्यक्रम थालिएको गाउँपालिका अध्यक्ष सूर्यबहादुर घर्तीले बताए ।
कृषि मार्फत नै किसानलाई आत्मनिर्भर बनाउन कृषकको उत्पादन, हातहातमा अनुदान जस्ता कार्यक्रम मार्फत कृषि र पशु पालनमा उत्पादनमा आधारित अनुदान दिने गरिएको छ ।
आकाशे पानीको भरमा रोपाइँ गर्ने निसीखोलाका किसानले सिंचाइको प्रयोग गदैनन् । सिंचाइ आयोजना सञ्चालन गरेर कृषिमा आधुनिकता ल्याउन गाउँपालिका जुटेको छ ।
निसीखोलाले चालु आर्थिक वर्षको नीति कार्यक्रम र बजेटमा पनि कृषि र पशुपालनका योजनालाई प्राथमिकतामा राखेको छ ।
विकासले बद्लिएकाे निसिखाेला हेर्नुहाेस्
