बैतडीको शिवनाथ गाउँपालिकाले सुरक्षित मातृत्व कार्यक्रम प्रभावकारी बनाएको छ । गर्भजाँच र सुरक्षित सुत्केरी सेवा तथा पोषणसहितका सचेतनामा जोड दिँदै शिवनाथले सुरक्षित मातृत्व कार्यक्रमलाई प्रभावकारी बनाएको हो ।
शिवनाथले पूर्ण संस्थागत सुत्केरी, शून्य होम डिलेभरी र पोषणमैत्री पालिकाको नीति अनुसारका काम गरिरहेको गाउँपालिका अध्यक्ष कर्णसिंह साउदले बताए । अध्यक्ष साउदका अनुसार पूर्ण संस्थागत सुत्केरी गाउँपालिका र ० होम डिलेभरी बनाउन ६ वटै वडा भित्र दक्ष जनशक्ति सहितको प्राविधिक सेवा उपलब्ध गराएको छ । त्यसका लागि १८ वटा सुरक्षित प्रसुति केन्द्र स्थापना गरिएको छ ।
गर्भवतीलाई कोशेली कार्यक्रम सञ्चालन गरि पालिका भित्रका ६ वटै वडालाई पूर्ण संस्थागत सुत्केरी वडा घोषणा गर्ने लक्ष्य राखिएको छ ।
गर्भवतीलाई घरमै अथवा टोलमै सेवा उपलब्ध गराउने उद्देश्यले घुम्ति सेवा मार्फत ३ पटक भिडियो एक्सरे सेवा संचालन गर्ने गरिएको छ ।
पालिकाको पहलमा सञ्चालित स्वास्थ्य, सचेतना र सुरक्षित मातृत्व अभियानले मातृशिशु मृत्युदर र आधारभूत सेवा नपाउँदा भोग्नुपर्ने स्थानीयका समस्या घटेका छन् ।
