धनकुटाको महालक्ष्मी नगरपालिकाले शैक्षिक विकास र गुणस्तर सुधारमा नीतिगत पहल थालेको छ । सामुदायिक विद्यालयको शिक्षालाई गुणस्तरीय बनाउने र गाउँकै विद्यालयमा दक्ष जनशक्ति उत्पादन गर्ने उद्देश्यले महालक्ष्मीले शिक्षा क्षेत्रलाई प्राथमिकतामा राखेर दिर्घकालिन महत्व राख्ने काम गरेको हो ।
विगतमा सुरु भएका असल अभ्यासलाई निरन्तरता दिँदै वर्तमान जनप्रतितिधिले महालक्ष्मीको शैक्षिक विकास र गुणस्तर सुधारमा आशातित् काम गरिरहेका छन् ।
२ वर्षअघि सम्म महालक्ष्मीमा ५३ वटा सामुदायिक विद्यालय थिए । विद्यार्थी कम भएका ६ वटा विद्यालय नगरपालिकाले मर्ज गरेको छ ।
विद्यार्थी अनुपातमा शिक्षक व्यवस्थापन, आवश्कता अनुसार विद्यालयका भवन र अन्य पूर्वाधार विकास, विद्यार्थी संख्या कम भएका र समुदायको रायका आधारमा विद्यालय मर्जसहितका काम भएका छन् ।
शैक्षिक कार्ययोजना बनाएर विद्यार्थी भर्नादेखि परीक्षाप्रणालीमा सुधारसम्मका काम गर्दै विश्वमा प्रतिस्पर्धा गर्ने जनशक्ति महालक्ष्मीमै उत्पादन गर्नेगरी काम भईरहेको नगरप्रमुख ध्रुवराज रायाले बताए । वडाअध्यक्ष हुँदा अघिल्लो कार्यकालयमा कार्यपालिकामा बसेर काम गरेको र शैक्षिक विकासको खाका बोकेर जिम्मेवारीमा आएकाले पनि देखिनेगरी काम गर्न लागि परेको नगरप्रमुख रायाको भनाई छ ।
धनकुटाको दुर्गम क्षेत्रमा पर्ने महालक्ष्मी नगरपालिका भित्रको शैक्षिक गुणस्तर विगत भन्दा सुधारोन्मुख छ ।
स्थानीय सरकारको नेतृत्व गरेपछि शिक्षा क्षेत्रका समस्याहरु घटेको सरोकारवालाहरु बताउँछन् ।
