ओखलढुंगाबाट गत आर्थिक वर्षमा ७९ करोड रुपैयाँ बढी रकम फ्रिज भएको छ । जिल्लाको विकास निर्माणका लागि विनियोजन भएर आएका तर समयमा काम नभएका कारण खर्च हुन नसकेको ७९ करोड रकम संघिय सरकारको खातामै फिर्ता भएको अर्थात् फ्रिज भएको हो ।
गत आर्थिक वर्ष २०८०-०८१ मा कुल ७९ करोड ३९ लाख ६२ हजार ३५५ रुपैयाँ १६ पैसा रकम फ्रिज भएको कोष तथा लेखा नियन्त्रक कार्यालय ओखलढुंगाका प्रमुख कोष नियन्त्रक मनोज कुमार जोशीले जानकारी दिए । उनका अनुसार जिल्लाका लागि प्रदेश तथा सङ्घीय सरकारले विनियोजन गरेको बजेट मध्ये खर्च नभएको उक्त रकम फ्रिज भएको प्रमुख कोष नियन्त्रक जोशीको भनाई छ । ‘समयमा काम नहुँदा नियमानुसार भुक्तानी दिन सकिन्न । गत वर्ष जिल्लाको धेरै विकास बजेट फिर्ता भयो ।’ जोशीले भने, ‘प्रकृया पुगेर आएकालाई मात्रै भुक्तानी दिने गरेका छौं । अन्य रकम नियमानुसार फिर्ता हुन्छ ।’ रकम फिर्ता हुँदा जिल्लाको विकास निर्माण प्रभावित हुने भएकाले सरोकारवालाले समयमै गुणस्तरीय काम गरेर भुक्तानी लिनुपर्ने उनको सुझाव छ ।
सङ्घ र प्रदेश दुवैतर्फ आव २०८०-०८१ मा जिल्लाका लागि कूल आठ अर्ब ५४ करोड ५१ लाख ७६ हजार ११५ रुपियाँ बजेट विनियोजन भएको थियो । उक्त बजेटमध्ये सङ्घतर्फ चार अर्ब ७८ करोड ७३ लाख ६६ हजार ३१६ रुपियाँ चालु र एक अर्ब १८ करोड १२ लाख ४७ हजार ५८१ रुपियाँ पुँजीगत रहेको थियो ।
त्यस्तै गत आवका लागि प्रदेशतर्फ चालु बजेट ६२ करोड ७२ लाख ५५ हजार र पुँजीगत बजेट एक अर्ब ५५ करोड ४८ लाख ८४ हजार बजेट यस जिल्लाका लागि विनियोजन भएको थियो ।
कोष तथा लेखा नियन्त्रक कार्यालयका अनुसार जिल्लाका स्थानीय तहलाई निकासा भएको बजेटमा पनि खर्चको विवरण वर्षेनी घटेर आउने गरेको छ । विगतका वर्षदेखि नै सबैजसो स्थानीय तहले शतप्रतिशत विकास बजेट खर्च गर्न सकेका छैनन् ।
तथ्याङ्कले विकास बजेट खर्च नहुने देखाएपनि जिल्लाका दर्जनौं आयोजना भने बजेट अभावका कारण रुग्ण बनेका छन् ।
राष्ट्रिय गौरवको योजनाका रुपमा रहेका लिखु एकवार, मोलुङ एकवार, उच्चस्तरीय चक्रपथसहितका सडक, दर्जनौं सडकपुलसहितका पूर्वाधार विकासका काम वषौंदेखि बजेट अभावमा अधुरै छन् ।
