संघियतापछि जनप्रतिनिधिको सकृयतामा भएको विकासले धनकुटाको विकट गाउँ चानुवा बदलिएको छ । साविकको चानुवा गाविस संघियतापछि महालक्ष्मी नगरपालिकाको वडा नम्बर ४ बनेको छ । विगतमा दुर्गम चानुवाका गाउँटोलहरु गाउँमा विकास बढेसँगै सुगम बन्न थालेका हुन् ।
खानपानीको चरम संकट रहेको चानुवामा स्थानीय जनप्रतिनिधिको पहलमा लिफ्ट मार्फत पानी तानेर नागरिकको खानेपानी समस्या समाधान गर्ने प्रयास गरिएको छ । याे खानेपानी याेजना सम्पन्न हुँदा यहाँकाे पानी अभावकाे समस्या समाधान हुनेछ ।
वर्तमान वडाअध्यक्षको नेतृत्वमा सडकसहितका पूर्वाधार विकासका कामले गति लिएको छ ।
कृषि र पशुपालनको प्रचुर सम्भावना भएको यो ठाउँमा परम्परागत निर्वाहमुखी खेतीलाई आधुनिक, व्यवसायिक र सामुहिक खेतीमा जोड दिइएको छ । कृषि र पशुपालन मार्फत वडाबासिको उन्नति र वडाको समृद्धिको लक्ष्य लिइरहेको वडा अध्यक्ष शुक्रबहादुर बुढाथोकीले बताए । २०७४ को निर्वाचनबाट वडा सदस्यमा निर्वाचित भएर पहिलो कार्यकाल वडाको समस्या, अवस्था र सम्भावना पहिचान गर्दै वडा सञ्चालनको अनुभव लिएका बुढाथोकी स्थानीय तहको दोस्रो निर्वाचनबाट वडाअध्यक्षमा निर्वाचित भएसँगै सिमित स्रोतबाटै पनि नागरिकका असिमित माग र आवश्यकता पुरा गर्नेगरी काम गरिरहेका छन् ।
वडा कार्यालयको व्यवस्थापन, इन्टरनेटको पहुँच विस्तार र सेवा प्रवाहको गुणस्तर वृद्धि लगायतका काम गरेका वडाअध्यक्ष बुढाथोकीले वडाको विकासका लागि बजेट मागेर नगरपालिका मार्फत प्रदेश र संघ सरकारसम्म पुगिरहेका छन् ।
साविकको सिंगो गाविस एउटै वडा हुनु, पर्याप्त आन्तरिक स्रोत नहुनु, भोगोलिक विकटता र छरिएको बस्ति हुनु चानुवाको विकासका चुनौती हुन् । यद्यपि यहाँका जनप्रतिनिधिले वडाको विकास र समृद्धिका लागि अधिकतम् पहल गरिरहेका छन् ।
भिडियाेमा हेर्नुहाेस् चानुवाकाे विकास
