सिन्धुलीको तीनपाटन गाउँपालिकाले महिलालाई उद्यम मार्फत आत्मनिर्भर बनाइरहेको छ । पालिका भित्रका बेरोजगार महिलालाई सीपमुलक तालिम दिएर दक्ष बनाई उद्यमशिलताका लागि आवश्यक आर्थिक तथा प्राविधिक सहयोग गर्दै तीनपाटनले महिलालाई उद्यम मार्फत आत्मनिर्भर बनाएको हो ।
वर्षेनी तीनपाटनमा महिला लक्षित कार्यक्रमहरु सञ्चालनमा भईरहेको र त्यस्ता कार्यक्रमलाई उद्यमशिलता मार्फत आयस्रोत वृद्धिमा केन्द्रित गरेर स्थानीय स्तरमै महिलालाई आत्मनिर्भर बनाइरहेको गाउँपालिका अध्यक्ष कर्णबहादुर मगरले बताए । ‘पुरुषसँग भएको १ सय रुपैंया भन्दा महिलासँग भएको सय रुपैंयाले धेरै काम गर्छ । महिला आत्मनिर्भर भए परिवार सुखि र पालिका समृद्ध बन्नेछ ।’ अध्यक्ष मगरले अनलाइन सरोकारसँग भने, ‘महिलालाई आत्मनिर्भर बनाउन विभिन्न सीपमुलक तालिमहरु वर्षेनी आयोजना गरेका छौं । व्यवसाय गर्नेलाई पालिकाले थप आर्थिक तथा प्राविधिक सहयोग र आवश्यक उपकरण समेत सहयोग गर्दछ ।’ विगतमा घरभित्रै सिमित हुने महिलाहरु स्थानीय तह गठनभएपछि समक्ष, सवल र उद्यमी बन्न थालेको अध्यक्ष मगरको भनाई छ ।
गाउँपालिकाले दिएको सीपको सदुपयोग गर्दै तीनपाटनका महिलाहरुले व्यवसाय सुरु गरेर राम्रो आम्दानी गर्न थालेका छन् ।
संघियता कार्यान्वयनसँगै २०७४ साल देखि पालिका अध्यक्षको जिम्मेवारीमा रहेका अध्यक्ष मगरले आफ्नो यो कार्यकाल सम्पन्न हुँदा बेरोजगारी समस्या समाधान गर्दै स्थानीय स्तरमै पेशा, व्यवसाय र कृषि तथा पशुपालनबाट नागरिकहरुलाई आत्मनिर्भर बनाई गरिबी न्यूनिकरण गर्ने लक्ष्य अनुसार काम गरिरहेका छन् ।
स्थानीय सरकारको दर्विलो साथ पाएपछि उत्साहित तीनपाटनका महिलाहरु सीप सिक्न र व्यवसाय सञ्चालन गर्न लागेका छन् ।
