ठेकेदारले सडक निर्माणको काम समयमा सम्पन्न नगरेपछि सप्तरीको छिन्नामस्ता गाउँपालिकाका जनप्रतिनिधि संघीय सरकार विरुद्ध आफैं आन्दोलनमा उत्रिने भएका छन् । सप्तरीको छिन्नमस्ता शक्तिपीठसम्म पुग्ने रुपनी–छिन्नमस्तादेखि भारतीय नेउर बोर्डरसम्मको सडक तोकिएको समयमा निर्माण नभएको र पटक पटक नियामक निकायलाई अनुरोध गर्दापनि कुनै सुनुवाई नभएपछि छिन्नमस्ताका जनप्रतिनिधिहरू आन्दोलित बनेका हुन् ।
लामो समयदेखि सडक खनेर छोड्दा खाल्डाखुल्डी भएर आवतजावतमा समस्या हुँदै आएको र ध्यानाकर्षण गराए पनि काम नगरेको भन्दै केही दिन अघि सडक डिभिजन कार्यालय लहानमा दवावमुलक धर्ना बसेका छिन्नामस्ता गाउँपालिका अध्यक्ष विद्यानन्द चौधरी नेतृत्वका जनप्रतिनिधिहरुले अब सिंहदरबार केन्द्रित आन्दालेन गर्ने भएका हुन् ।
छिन्नमस्ताका जनप्रतिनिधिहरूले सडक डिभिजन कार्यालय लहान अगाडि धर्ना दिँदै आएका थिए । तर, त्यसको प्रभाव नदेखिएपछि काठमाडौंकेन्द्रित आन्दोलनको चेतावनी दिएका हुन् ।
नेपाल र भारत दुवैतर्फबाट शक्तिपीठ जोड्ने सडक निर्माण नहुँदा पर्यटकहरूलाई आवागमनमा समस्या भएको भन्दै स्थानीयवासी र जनप्रतिनिधिले आन्दोलन गर्दै आएका छन् ।
छिन्नमस्ता गाउँपालिकाका अध्यक्ष विद्यानन्द चौधरीले सडकको दूरवस्थाका कारण पछिल्लो समय छिन्नमस्ता शक्तिपीठ आउने भक्तजन र पर्यटकहरूको संख्यामा कमी आएको र स्थानीयलाई समेत आवतजावतमा समस्या भएको बताउँदै रुग्ण सडक निर्माणका लागि सिंहदरबार र संघीय संसद् वरिपरि आन्दोलन गर्ने घोषणा गरेका छन् ।
जनप्रतिनिधि नै अगुवा भएर थालेको आन्दोलनलाई पालिकावासीले साथ दिइरहेका छन् ।
सडक डिभिजन कार्यालयले २५ करोड ८८ लाख दुई हजार रुपैयाँमा साह इन्जिनियरिङ प्रालिलाई सडक निर्माणको ठेक्का दिएको थियो । तर, गत असारमै निर्माण सम्पन्न भइसक्नुपर्ने सडकमा हालसम्म १३.३३ प्रतिशत मात्रै काम भएको छ ।
समयमा सडक निर्माणको काम सम्पन्न नहुँदा वर्षामा हिलो र हिउँदमा धुलोको समस्या छ ।
