सिन्धुपाल्चोकको मेलम्ची नगरपालिकाले नगरभित्रका सामुदायिक विद्यालयमा मोवाईल निषेध गरेको छ । मोवाईलको प्रयोगले पठनपाठन प्रभावित हुने भन्दै नगरपालिकाले विद्यालय समयमा शिक्षक र विद्यार्थी दुवैले मोवाईल चलाउन नपाउने नीति ल्याएको हो ।
कक्षा कोठामा मोवाईल बोकेर जाँदा फोन, म्यासेन आउने, घण्टि बज्ने र सामाजिक सञ्जालको प्रयोगसमेत हुँदा पठनपाठन नराम्ररी बिग्रिने अवस्था आउने खतरा देखेर विद्यालयमा मोवाईल निषेध गरेको नगरप्रमुख आईतमान तामाङले अनलाइन सरोकारसँग बताए । नगरभित्रका सबै विद्यालयमा विद्युतीय हाजिरी मेसिन जडान गरेपछि शिक्षकहरुको नियमितता बढेको छ । ई हाजिरी प्रभावकारी भएपछि नगरपालिकाले नीति नै बनाएर मोवाईल फोनको प्रयोगलाई विद्यालयसमयमा पूर्ण प्रतिबन्ध लगाएको नगरप्रमुख तामाङको भनाई छ ।
मेलम्ची नगरपालिका भित्र २१ वटा सामुदायिक विद्यालय छन् । विद्यालयलाई प्रविधिमैत्री बनाउने तर प्रविधिकै कारण पठनपाठन प्रभावित बन्न नदिने नगरपालिकाको नीति छ ।
विद्यालयमा शिक्षकको अनियमित रूपमा हुने उपस्थिति कम गरी गुणस्तरीय र प्रभावकारी शिक्षा प्रदान गर्न ई हाजिरी प्रणाली सुरुवात गरिएको थियो ।
जिल्लाका १२ स्थानीय तहमध्ये मेलम्ची नगरपालिकाले विद्यालयमा ई हाजिरी प्रणाली सुरु गर्ने पहिलो स्थानीय तह बनेको थियो । विद्यालयमा मोवाईल निषेध गर्ने पनि पहिलो स्थानीय तह बनेको छ ।
