रामेछापको मन्थली नगरपालिका अभिभावक विहिन बालबालिकाको सहारा बनेको छ । बुबा–आमा दुवैको मृत्युभएको, बुबाको मृत्यु भएको र आमाले अर्को विवाह गरेको वा बुबा आमा दुवै बेपत्ता भएर संरक्षण र रेखदेखबाट बञ्चित भएका बालबालिकालाई मन्थली नगरपालिकाले संरक्षण, लालनपालन र शिक्षादिक्षाको सुनिश्चितता गराउन थालेको हो ।
मन्थली नगरपालिकाले सार्वजनिक सूचना जारी गरेर अभिभावक (बुबाआमा) विहिन बालबालिकाको संरक्षणका लागि आवेदन आवहन गरेको छ ।
प्रदेश सरकारसँगको समन्वयमा मन्थली नगरपालिकाले अभिभावक विहिन बालबालिकालाई मासिक २ हजार भत्ता दिंदै आएको छ ।
नगरपालिकाका १४ वटै वडामा रहेका बाबुआमाको हेरचाह नपाएका र आफन्तको संरक्षणमा रहेका त्यस्ता बालबालिकाको तथ्याङ्क संकलन गरेर प्रदेश सरकार र सहयोगी संघसंस्थाको पहलमा अभिभावक विहिनलाई सहारा दिने र बेसहारा बालबालिकालाई शिक्षाको पहुँचमा ल्याएर उज्ववल भविष्य निर्माणमा योगदान गर्नेगरी पहल गरिएको नगरप्रमुख लब श्रेष्ठको भनाई छ । यहि वर्षभित्र मन्थली नगरपालिकालाई बालमैत्री स्थानीय तह घोषणाको लक्ष्य अनुसार सबै सर्त पुरागर्नेगरी काम भईरहेको नगरप्रमुख श्रेष्ठको भनाई छ ।
२०८१ चैत्र मसान्तसम्म बालमैत्री स्थानीय तह घोषणाको लक्ष्य अनुसार मन्थलीका सबै १४ वटै वडामा बालमैत्री शासन कार्यक्रमलाई प्राथमिकता दिईएको छ ।
सामाजिक समावेशीकरण र बालमैत्री कार्यक्रम सञ्चालनका लागि मन्थली नगरपालिकाले चालु आर्थिक वर्षमा १ करोड ३५ लाख बजेट विनियोजन गरेको छ ।
