शैक्षिक क्षेत्रका अगुवाहरुले नेपाली महिलाहरुले मनाउने तीज पर्वको सांस्कृतिक महत्व जोगाउँदै आधुनिक समाज सुहाउँदो बनाउनुपर्नेमा जोड दिएका छन् । पत्रकारिता तथा आमसञ्चार केन्द्रीय विभागले बल्खुमा आयोजना गरेको ‘तीज विशेष कार्यक्रम’ मा शैक्षिक क्षेत्रका अगुवाहरुले पुरानो संस्कार र सामाजिक सांस्कृतिक महत्व बोकेको चाड तीजलाई युग सुहाउँदो बनाउनुपर्ने धारणा राखेका हुन् ।
विभागअन्तर्गत स्नातकोत्तर (एमए) दोस्रो सेमेष्टरमा अध्ययनरत विद्यार्थीहरूद्वारा आयोजित कार्यक्रम कार्यक्रमका प्रमुख अतिथि विभागका प्रमुख डा. कुन्दन अर्यालले तीज मनाउने तौरतरिका समयसापेक्षित रूपमा परिवर्तन हुनुपर्ने बताए । “५०÷६० वर्ष अगाडिको तीज र अहिलेको तीज उस्तै हुनुहुन्न,” प्रमुख अर्यालले भने, “अब रुँदै माइतीघर जाने होइन, हाँसेरै जाने हो । श्रीमान्को खुट्टाको पानी खाने, यसो गर्ने उसो गर्ने अब हुनुहुन्न ।” नेपालीहरुले मनाउने चाडबाड मध्येको बढी अर्थपूर्ण चाड भएपनि यो आधुनिक समाजसँग मिल्दोजुल्दो हुन नसकेको यद्यपि आधुनिकताका नाममा खर्चिलो र भड्कीलो बन्दै गएकाले तीजको महत्व जोगाउँदै समय र समाजको विकासक्रमसँग सुहाउँदो पर्वका रुपमा मनाईनु पर्ने बताका हुन् ।
कार्यक्रमका विशिष्ट अतिथि उपप्राध्यापक डा. देवराज अर्यालले शैक्षिक संस्थामा आयोजित त्यस्ता सांस्कृतिक कार्यक्रमले तीजको मौलिकता संरक्षण गर्न मद्दत पुग्ने बताए । “विद्यार्थीहरूलाई हामीले प्रेजेन्टेसन गराउँछौं, विद्यार्थीहरूले यसरी विभिन्न कार्यक्रमको आयोजना गर्छन् । यी कार्यक्रमहरू आपसमा सहयोगी बन्छन्,” अर्यालले भने, “यस्ता कार्यक्रमहरूले छुट्टै अर्थ राख्छन् । यो विद्यार्थीहरूको व्यक्तित्वसँग जोडिने कुरा पनि हो ।” उपप्राध्यापक डा. घमराज लुइँटेलले पत्रकारिता तथा आमसञ्चार केन्द्रीय विभाग त्रिविका अरु विभागहरूभन्दा सक्रिय रहेको बताए ।
यस्तै उपप्राध्यापक शशी मरासिनी, लेक्चरर लक्ष्मण हुमागाईं, एमए तेस्रो सेमेष्टरका नेता विद्यार्थी बाबुराम आचार्य लगायतले धारणा राखेका थिए ।
साङ्केन राईको अध्यक्षतामा भएको कार्यक्रम रन्जु अधिकारीले सञ्चालन गरेकी थिइन् ।
