जुम्लाको गुठिचौरमा प्याराग्लाइडिङ महोत्सव सुरु भएको छ । पर्यटनको प्रचुर सम्भावना भएको गुठिचौरमा स्काई फेष्टिबल अर्थात् आकासे पर्वका रुपमा प्याराग्लाइडिङ महोत्सव आयोजना गरिएको हो ।
जुम्लाको गुठिचौर गाउँपालिकाले पोखराबाट प्राविधिक टिम झिकाएर चारदिने महोत्सव सुरु गरेको हो ।
वरिपरि डाँडा बिचमा चौर भएको अत्यन्तै रमणीय क्षेत्र गुठिचौरमा गाउँपालिकाले आयोजना गरेको प्याराग्लाइडिङ महोत्सवमा राइडरले आकाशमा उडेपछि हेर्ने स्थानीयको भिड लागेको छ ।
जिल्ला समन्वय समितिका प्रमुख गौरीनन्द आचार्य र गाउँपालिका अध्यक्ष दानबहादुर बुढाले महोत्सवको उद्घाटन गरेका छन् । गुठिचौरको मैदानमा रिवन काटेपछि डाडाँबाट प्याराग्लाइडिङ उडान गरिएको थियो ।
प्याराग्लाइडिङ हेरेर र उडेर रमाउन जुम्ला र आसपासका स्थानीयहरु अहिले गुठिचौर आइपुगेका छन् ।
गाउँपालिका अध्यक्ष दानबहादुर बुढाले पर्यटकीय गुठिचौरमा सबैको ध्यान आकर्षण भएको र पर्यटकीय आधार तयार गरि आर्थिक उपार्जनका लागि महोत्सवको सुरुवात भएको बताए । यस क्षेत्रको पर्यटन प्रवद्र्धनमा टेवा पुग्ने अध्यक्ष बुढाको भनाई छ ।
महोत्सव भदौ ३१ गतेसम्म महोत्सव हुने भनिएता पनि टिकट धेरैले काटेपछि सबैलाई उडाएर मात्र महोत्सव समापन गर्ने तयारी छ । गाउँपालिकाले २ महिना अघि परीक्षणका लागि वावु एडभाञ्चर प्रा.लीलाई जुम्ला ल्याएर सफल परीक्षण गरिएको थियो । एउटा उडानको गुठिचौर गाउँपालिका निवासीलाई रु. ३ हजार र बाहिरकालाई रु. ४ हजार शुल्क निर्धारण गरिएको छ ।
वरिपरि पहाड र बिचमा बृहत् चौरले घेरिएको गुठिचौरमा गाउँपालिकाले महोत्सवको अवसर पारेर खुला पुरुष भलिबल प्रतियोगिता र खुला महिला देउडा प्रतियोगिता सञ्चालन गरिरहेको छ ।
