जुम्लामा स्काई फेस्टिवल सफल भएको छ । साहसिक पर्यटन प्रवद्र्धन गर्न गुठिचौर गाउँपालिकाले आयोजना गरेको प्यारागलाईडिङ महोत्सव सफलतापूर्वक सम्पन्न भएको हो ।
प्रतिकूल परिस्थितिको बीचमा गुठिचौर गाउँपालिकामा सञ्चालन गरिएको आकासे पर्व सफलतापूर्वक सम्पन्न भएको र यो कार्यक्रमले जुम्ला जिल्लाका नागरीकमा साहसिक पर्यटनको क्षेत्रमा उत्साह थपेको गुठिचौर गाउँपालिकाका अध्यक्ष दानबहादुर बुढाले बताए । करिब एक हप्तासम्म गुठिचौरको आकाशमा प्यारागलाईडिङ उडाएर साहसिक पर्यटनको सम्भावना स्थापित गरिएको अध्यक्ष बुढाको भनाई छ । ‘१ साता लामो आकाशे पर्व सफलतापूर्वक सम्पन्न भयो । जुम्ला जिल्लाका लागि त यो ऐतिहासिक कार्य हो नै यसले सिंगो देशमा एउटा सकारात्मक उर्जा र सम्भावनासँगै जुम्लाबासी जनताको एकता र भावनालाई सन्देशका रुपमा सम्प्रेषण भएको छ ।’ अध्यक्ष बुढाले भने, ‘गुठिचौर कर्णाली प्रदेशकै पर्यटकीय हव बन्छ । अझ प्यारागलाईडिङका लागि त यो ठाउँ अन्यन्त्र भन्दा सहज र सुन्दर छ भन्ने प्रमाणित नै भईसक्यो ।’ यसक्षेत्रको पर्यटकीय पूर्वाधार विकास र पर्यटन प्रवद्र्धनसँगै स्थानीयको आर्थिक समृद्धिका सवाल बोकेर अब प्रदेश र संघ सरकारमा बजेटका लागि पहल गर्ने अध्यक्ष बुढाको भनाई छ ।
गुठिचौरको आकाशमा १ सातासम्म प्यारागलाईडिङ उडाएर स्थानीयलाई सेवा र मनोरञ्जन दिलाएका प्यारागलाईडिङ राइडरहरुलाई जुम्लाबाट सम्मानसहित विदाई गरिएको छ ।
जुम्लाको आकाशमा उड्न जुम्लाकै क्याप्टेन बन्ने भए मनोज
जुम्लाको आकाशमा उड्न जुम्लाकै क्याप्टेन तयार गरिने भएको छ । गुठिचौरको आकाशमा प्यारागलाईडिङको सम्भावना देखेसँगै यहाँका स्थानीयले प्यारागलाईडिङ क्षेत्रमै सम्भावना चुम्ने योजना बनाएका छन् । जिल्लाकै क्याप्टेन तयार गर्ने दूरगामी सोच राखेर गुठिचौरका अध्यक्ष बुढाको पहलमा जुम्लाका मनोज रावल प्यारागलाईडिष्ट बन्ने भएका छन् ।
नेपालका ख्याति प्राप्त प्यारागलाईडिष्ट बावु एड्भेन्चरस् ग्रुपका प्रमुख सानुबाबु सुनुवारले जुम्ला जिल्लालाई एउटा प्यारागलाईडिङ्ग क्याप्टेन उपहार दिने प्रतिवद्वता सहित मनोज रावललाई संगै लिएर गएका छन् । सुनुवारले रावललाई आप्नै विद्यालयमा पढाउने र भविष्यमा प्यारागलाईडिङ्ग क्याप्टेन बनाइदिने बचन दिएका छन् ।
