ओखलढुंगाका सांसद रामहरि खतिवडाले रुम्जाटार विमानस्थलमा हवाइ सेवा सञ्चालन गर्न संस्कृति, पर्यटन तथा नागरिक उड्ययन मन्त्रीसँग माग गरेका छन् ।
अविरल वर्षाका कारण सबै सडकहरु भत्किएकाले रुम्जाटार विमानस्थलबाट काठमाडौं र विराटनगरमा उडान भर्न अनुराेध गर्दै चिठ्ठी लेखेका हुन् ।
खतिवडाले मन्त्रीलाई लेखेको हस्त लिखित पत्रमा वर्षापछिको विपद्का कारण यात्रामा असहजता उत्पन्न भएको परिस्थितीलाई मध्येनजर गर्दै तत्काल रुम्जाटारबाट दैनिक उडान भर्न माग गरिएको छ ।
मेयरले पनि भेटेका थिए मन्त्री
केही दिन अघि सिद्धिचरण नगरपालिकाका प्रमुख तेजन खनाल पनि रुम्जाटारमा नियमित उडानको माग गर्दै केही दिन अघि मन्त्रालय पुगेका थिए । मेयर खनालले मन्त्री पाण्डेलाई रुम्जाटार विमानस्थल सञ्चालनको आवश्यकता दर्शाएका थिए ।
जवाफमा मन्त्री पाण्डेले रुम्जाटार विमानस्थल सञ्चालनका लागि आफु सकारात्मक रहेको प्रतिक्रिया दिएका थिए ।
रुम्जाटार विमानस्थलमा लामो समयदेखि नियमित उडान भएको छैन ।
ओखलढुंगाका रुम्जाटार र चण्डेश्वरीमा दुई विमानस्थल छन् । तर दुवै ठप्प छन् ।
