त्रिभुवन विश्वविद्यालय पत्रकारिता तथा आमसञ्चार केन्द्रीय विभागको आयोजनामा शुभकामना आदान प्रदान तथा विदाई कार्यक्रम सम्पन्न भएको छ । तेस्रो सेमेस्टरका विद्यार्थीको आयोजनामा विभागमा अध्ययनरत चौथो सेमेस्टरका ५० भन्दा बढी विद्यार्थीको विदाई गर्दै दशैं दिपावलीलगायतका चावपर्वको अवसरमा शुभकामना आदान प्रदान गरिएको हो ।
कार्यक्रमका वत्ताहरुले पत्रकारिता क्षेत्रलाई अझ विश्वसनीय, भरपर्दो र गुणस्तरीय बनाउन सम्बन्धित क्षेत्रको ज्ञान र सीप आवश्यक रहेको बताएका छन् । त्रिभुवन विश्वविद्यालय पत्रकारिता तथा आमसञ्चार केन्द्रीय विभागले वडादशैं, दीपावली, नेपाल संवत् र छठ पर्वका अवसरमा यहाँ आयोजना गरेको शुभकामना आदानप्रदान कार्यक्रममा उनीहरूले बदलिँदो परिवेशमा सक्षम एवं कुशल पत्रकार बन्नका लागि आधुनिक सूचना प्रविधिसहित पत्रकारितासम्बन्धी सैद्धान्तिक, प्रयोगात्मक र व्यावहारिक ज्ञान हुन आवश्यक रहेको धारणा व्यक्त गरेका थिए ।
सो अवसरमा त्रिभूवन विश्वविद्यालय मानविकी तथा सामाजिकशास्त्र विभागका कामु डिन दुबिनन्द ढकालले सूचना प्रविधिको विकाससँगै सत्यतथ्य र आधिकारिक समाचारमार्फत समाजलाई सुसूचित गर्ने आमसञ्चार माध्यमलाई सही ढङ्गबाट अघि बढाउने जिम्मेवारी विशेषगरी पत्रकारिता विषयका विद्यार्थी तथा अध्यापकको रहेको बताए ।
त्रिवि पत्रकारिता तथा आमसञ्चार केन्द्रीय विभागका प्रमुख डा कुन्दन अर्यालले पछिल्लो समयमा पत्रकारिता क्षेत्रमाथि अनेकौँ चुनौती सिर्जना भएको उल्लेख गर्दै सैद्धान्तिक र व्यवहारिक ज्ञानसहित खारिएको कुशल पत्रकार उत्पादनका लागि समाचार सङ्कलन, सम्पादन तथा सम्प्रेषण कक्ष र शिक्षण सिकाइ कक्षलाई जोड्नुपर्ने बताए ।
कार्यक्रममा उपप्राध्यापकहरु डा देवराज अर्याल, शशीनाथ मराशिनी, डा घमराज लुईँटेल तथा विज्ञापन बोर्डका अध्यक्षसमेत रहेका लेक्चरर लक्ष्मण हुमागाँईलगायतले शुभकामनासहितको मन्तब्य राखेका छन् ।
उक्त क्याम्पसका तेस्रो सेमेस्टरका विद्यार्थीसमेत रहेका कार्यक्रमका संयोजक बाबुराम आचार्यले पत्रकारिता बिषय इथिकिल हुने हुँदा त्रिभूवन विश्वविद्यालयको पत्रकारीता विभागलाई ईथिकल बनाईनुपर्ने विचार व्यक्त गरेका थिए ।
त्रिविले २०५८ सालदेखि पत्रकारिता तथा आमसञ्चार विषयमा स्नातकोत्तर, २०६७ सालदेखि विद्यावारिधि र २०७४ सालदेखि दर्शनाचार्य तथा विद्यावारिधि तहको अध्यापन गर्दै आएको छ ।
