प्रथम रुम्जाटार फुटबल कपको उपाधि मितेरी फुटबल क्लब हिलेपानीले जितेको छ । मंगलबार भएको फाइनल खेलमा जगरबोट फुटबल क्लब रुम्जाटारलाई २–१ गोल अन्तरले हराउँदै मितेरी फुटबल क्लबले उपाधि जितेको हो ।
भगवती फुटबल क्लब रुम्जाटारलाई ३–२ गोल अन्तरले हराउँदै सह–आयोजक रुम्जाटार युनाइटेड क्लब तृतीय भएको छ ।
प्रतियोगितामा प्रथम, द्वितिय, तृतीय हुने समुहले क्रमशः नगद ५०, ३५ र २० हजारका साथमा ट्रफी, मेडल र प्रमाणपत्र प्राप्त गरेका छन् ।
प्रतियोगिताका मितेरी फुटबल क्लबका राजु राई सर्वाधिक गोलकर्ता, जगरबोट एफसीका प्रकाश श्रेष्ठ उत्कृष्ट खेलाडी र मितेरी एफसीकै जोन श्रेष्ठ उत्कृष्ट गोल रक्षक बनेको आयोजक समाजका अध्यक्ष शिवदास गुरुङले बताए ।
विजेता क्लब तथा उत्कृष्ट खेलाडीहरुलाई सिद्धिचरण नगरपालिकाका उप–प्रमुख केदारबाबु बस्नेतले पुरस्कार हस्तान्तरण गरेका थिए ।
रुम्जाटार युथ तथा रुम्जाटार कलाकार समाजको आयोजना र रुम्जाटार युनाइटेड क्लबको सह–आयोजनामा फुटबल प्रतियोगितासँगै बृहत साँस्कृतिक कार्यक्रम समेत सञ्चालन गरिएको थियो ।
खेलकुदका माध्यमबाट पर्यटकीय नगरी रुम्जाटारको पर्यटन प्रवद्र्धन गर्ने उद्देश्यले आयोजित प्रतियोगिताको गत असोज २ गते कोशी प्रदेशका पूर्व मन्त्री अम्बिरबाबु गुरुङले उद्घाटन गरेका थिए ।
चाडपर्वको अवसर पारेर जिल्लाका विभिन्न स्थानमा खेलकुदका कार्यक्रमहरु भईरहेका छन् ।
