नेपाल कम्युनिष्ट पार्टी (एमाले) को जागरणसभाका लागि तयारी पूरा भएको छ । सत्तारुढ दल नै सडकमा आएर जनता जगाउने अभियान सुरु गरेको हो ।
जागरणसभाका लागि केही बेरमा भद्रकालीबाट ¥याली सुरु भएर दरबारमार्ग पुगेर सभामा परिणत हुनेछ । एमालेको जागरणसभाका काठमाडौँ, भक्तपुर, ललितपुरलगायत आसपासका जिल्लाबाट एक लाख मानिस उपस्थित गराउने तयारी रहेको छ ।
एमाले काठमाडौँ, भक्तपुर र ललितपुर जिल्ला कमिटीको आयोजनामा आज दरबारमार्गमा जागरण सभाको कार्यक्रम हुँदैछ । कार्यक्रमलाई एमाले अध्यक्ष तथा प्रधानमन्त्री केपी शर्मा ओलीलगायतका नेताहरूले सम्बोधन गर्ने कार्यक्रम छ ।
राष्ट्रिय सद्भाव र राष्ट्रिय एकता कायम गर्ने उद्देश्यले उक्त जागरणसभा आयोजना गर्न लागिएको एमालेका प्रचार विभाग प्रमुख राजेन्द्र गौतमले जानकारी दिए ।
अभियान सफल बनाउन नेकपा एमालेका नेता कार्यकर्ता र जनसंगठनका नेताहरु सडकमा उत्रिएका छन् ।
