जुम्लाको पातारासी गाउँपालिका–२ मा नेपाल टेलिकमको टावर सञ्चालनमा आएको छ । प्रविधिको विकासले विश्वभर सहजता आएपनि पातारासी २ का नागरिक सञ्चारको पहुँचमा पुग्न सकेका थिएनन् । नागरिक सञ्चार तथा इन्टरनेटको उपयोग गर्नबाट बञ्चित भएका थिए भने वडा कार्यालयलाई प्रविधिमैत्री सेवा प्रवाह गर्न समस्या थियो ।
स्थानीयले गाउँमा सञ्चारको पहुँच विस्तार गर्न माग गर्दै आएका थिए । जनप्रतिनिधिले यसको अगुवाइ गरेका थिए ।
पातारासी गाउँपालिका अध्यक्ष पूर्णसिंह बोहोराले अध्यक्षको कार्यभार सम्हालेदेखि नै पालिकाभित्र सञ्चार सेवाको पहुँच विस्तारलाई प्राथमिकता दिएका थिए ।
जिल्लाको विकट गाउँ मानिने यो वडाको फुर्कीसल्ला डाँडामा टावर राखेर सोमबारदेखि टेलिफोन सेवा सञ्चालनमा ल्याइएको हो ।
अब पातारासीका दुर्गम गाउँमा पनि नेपाल टेलिकमको फोरजीसहितको सेवा सुरु भएपछि सहज भएको छ । यहाँका स्थानीयवासी सञ्चारको पहुँचमा पुगेका छन् ।
उक्त टावरबाट टुजी र फोरजी सेवा सञ्चालन गरिएको छ ।
नेपाल टेलिकमले टावर स्थापना गरेसँगै उक्त गाउँपालिकाका वडा नम्बर १, २ र ३ का स्थानीय पहिलोपटक दूरसञ्चार सेवाबाट लाभान्वित भएका वडाध्यक्ष बलबहादुर बोहोराले अनलाईन सरोकारसँग बताए । दुर्गम गाउँका नागरिक अनलाइन मार्फत विश्वसँग जोडिएको उनको भनाई छ । यद्यपी टेलिकमको सेवाको गुणस्तर भने कमजोर रहेकाले पावर बढाउन टेलिकमसँग वडाअध्यक्ष बोहोराले आग्रह गरेका छन् ।
गाउँमा टेलिफोन सुचारु भएपछि कर्णालीको दुर्गम जिल्ला जुम्लाको पनि दुर्गम गाउँ पातारासीका नागरिक प्रविधि मार्फत विश्वभर सञ्चार गर्न र सूचना आदानप्रदान गरेर दैनिकी सहज बनाउने सक्ने अवस्थामा पुगेका छन् ।
जुम्लाका आठवटै स्थानीय तहका १८ स्थानबाट सञ्चार सेवा प्रवाह भईरहेको नेपाल टेलिकम जुम्लाले जनाएको छ ।
