ताप्लेजुङको मैवाखोला गाउँपालिकाले विद्यालय बाहिररहेका अपाङ्गता भएका बालबालिकालाई घरमा आधारित शिक्षा मार्फत अक्षर चिनाउने भएको छ । शारीरिक अपाङ्गता भएका कारण औपचारिक शिक्षा आर्जन गर्न विद्यालय जान नसक्ने बालबालिकालाई गाउँपालिकाले घरैमा शिक्षक पढाएर अक्षर चिनाउने भएको हो ।
फरक क्षमता भएका बालबालिकाहरुलाई विद्यालयमा ल्याएर पठनपाठन गराउन सम्भव नभएकाले घरैमा आधारभूत रुपमा अक्षर र अंक चिनाउने, संख्यात्मक रुपमा ज्ञान दिने र सामाजिक एवम् संवेगात्मक सीप सिकाउने उद्देश्यले घरमा आधारित शिक्षा कार्यक्रमको नीति ल्याइएको गाउँपालिका अध्यक्ष विजय प्रकाश वनेमले अनलाइन सरोकारसँग बताए । पालिका भित्रका अपाङ्गता भएका बालबालिकाको यकिन तथ्याङ्क संकलन र घरमा आधारित शिक्षाको पाठ्यक्रम निर्माणको काम भईरहेको अध्यक्ष वनेमको भनाई छ ।
मैवाखोलामा सामाजिक विकास मन्त्रालय कोशी प्रदेश, मैवाकोखा गाउँपालिका र करुणा फाउण्डेसन नेपालको साझेदारीमा अपाङ्गता रोकथाम तथा पुर्नस्थापना कार्यक्रम सञ्चालनमा छ । यो कार्यक्रम अन्तरगत यहि फाल्गुण १ गतेबाट ३ महिना मैवाखोलामा घरमा आधारित शिक्षा कार्यक्रम सञ्चालन हुनेछ ।
पहिलो चरणमा वडानम्बर ५ का नोर्बु शेर्पा र वडा नम्बर ६ की सुम्निमा लिम्बु घरमा आधारित शिक्षा कार्यक्रममा समेटिने छन् ।
गाउँपालिकाले घरमा आधारित शिक्षा कार्यक्रम अन्तरतगत अध्यापन गराउने शिक्षकको दर्खास्त आवहन गरेको छ ।
