नवलपरासीको सुनवल नगरपालिकाले पशुवस्तुको बाँझोपन निवारण गर्न ‘डोर टु डोर’ अभियान चलाउने भएको छ । किसानलाई गाउँमै आत्मनिर्भर बनाउने नीति लिएको सुनवल नगरपालिकाले पशुवस्तुको नश्ल सुधार गर्दै बाँझोपन हटाएर पशुपालक किसानको आयस्रोत वृद्धिका लागि यो अभियान चलाउने भएको हो ।
नगरभित्रका किसानले पालेका गाई भैँसीमा बाझोपन निवारण गर्न विशेषज्ञसहितको सहभागितामा डोर टु डोर कार्यक्रम संचालन गर्ने तयारी गरिएको नगर प्रमुख विमला अर्यालले अनलाइन सरोकारलाई बताइन् ।
डोर टु डोर कार्यक्रमका लागि किसानबाट आवेदन लिनेकाम भईरहेको छ । हालसम्म २५ जना किसानले नगरमा निवेदन दिइसकेका छन् । थप २५ वटा निवेदन लिएर ५० वटा पुगेपछि अभियानको थालनी गरिने नगरप्रमुख अर्यालको भनाई छ ।
गाई भैँसीमा बाँझोपन हुँदा प्रजनन नहुने र दूध उत्पादन बन्दहुने र उपचारपश्चात् प्रजनन हुने र दूध उत्पादन पनि राम्रो हुने भएकाले सुनवलमा यो अभियान सुरु गर्न लागिएको हो ।
सुनवलका अधिकांश किसान कृषि र पशुपालनमा आवद्ध छन् । स्थानीय सरकारले किसान लक्षित यस्ता कार्यक्रमहरु ल्याएपछि व्यवसायिक खेती र पशुपालनमा किसान जुटेका छन् ।
