स्याङ्जाको भीरकोट नगरापालिकाले बेमौसमी तरकारी खेती विस्तार गर्ने भएको छ ।
निर्वाहमुखी परम्परागत खेती गर्दै आएका किसानलाई बेमौसमी तरकारी खेतीमा आकर्षित गराएर गाउँमा आत्मनिर्भर बनाउने अवधारणा अनुसार भीरकोटमा व्यवसायिक बेमौसमी तरकारी खेती विस्तार गर्न लागिएको हो ।
मौसमी तरकारी खेतीको तुलनामा बेमौसमी तरकारी खेतीबाट कृषकले मूल्य पाउने र तरकारीको बजारीकरण पनि सहज हुने भएकाले हेफरसँगको साझेदारीमा यसवर्ष देखि भीरकोटमा बेमौसमी तरकारी विस्तार गरिने नगर प्रमुख गोविन्द कुमार कर्माचार्यले अनलाइन सरोकारसँग बताए ।
हेफरको ३० प्रतिशत र बाकी ७० प्रतिशत नगरपालिकाले लगानी गरेर करिब दुई करोडको लागतमा बेमौसमी तरकारी खेती विस्तार गरिने नगरप्रमुख कर्माचार्यको भनाई छ ।
भीरकोटका सबैजसो वडामा बेमौसमी तरकारी खेतीको उत्तिकै सम्भावना छ ।
