बाग्लुङको बरेङ गाउँपालिकाले सबै नागरिकका घरमा क्यूआरकोड सहितको विद्युतीय घर नम्बर राख्ने भएको छ । पालिकाको चालु आर्थिक वर्षको ‘मेरो घर, गाउँपालिको नजर’ भन्ने नीति अनुरुप पालिकाभित्रका सबै घरधुरीको अवस्था पहिचान गर्न क्यूआरकोड सहितको विद्युतीय घर नम्बर राख्ने तयारी गरेको हो ।
प्रविधिमैत्री पालिका बनाउने अभियान स्वरुप हरेक घरको डिजिटल डाटा राखेर घरघरमा क्युआरकोड राख्ने र त्यसको अनुगमन पालिकाबाटै गर्नेगरी यो कार्यक्रम सञ्चालन गर्न लागिएको हो ।
बरेङ गाउँपालिका भित्रका ५ वटै वडाका करिब २ हजार ९ सय २५ घरधुरीमा यसैवर्ष क्युआर कोडसहितको विद्युतीय घर नम्बर राख्ने तयारी भईरहेको छ ।
सुरुमा सर्वेक्षण गर्ने क्युआरकोड जेनेरेट गरेर घरघरमा राख्ने कामका लागि सर्वेक्षक नियुक्तीको प्रकृया अघि बढाइएको बरेङ गाउँपालिका अध्यक्ष कृष्णप्रसाद शर्माले अनलाइन सरोकारलाई बताए । अध्यक्ष शर्माका अनुसार सर्वक्षक छनौट भएपछि काम सुरु हुनेछ ।
गाउँपालिकाको र वडा कार्यालयको सेवा, विद्यालयको सूचना र स्वास्थ्य संस्थाको सुविधासमेतलाई प्रविधिसँग जोडेर प्रचार गरिरहेको बरेङले सिंगो पालिकालाई नै सूचना प्रविधिमा आधारित स्मार्ट पालिका बनाउने नीति लिएको छ ।
