नुवाकोटको म्यागङ गाउँपालिकाले मौलिक पहिरनको संरक्षण गर्न थालेको छ । बढ्दो आधुनिकीकरणले परम्परागत मौलिक पहिरन लोप हुँदै गएका बेला म्यागङ गाउँपालिकाले नीतिगत रुपमै परम्परागत जातिय पहिचान झल्काउने पोशाकको पहिरनमा जोड दिएको हो ।
म्यागङ गाउँपालिकाले हप्तामा एक दिन बुधबार अनिवार्य परम्परागत मौलिक पोशाक लगाउनुपर्ने नियम लागू गरेको छ । म्यागङका जनप्रतिनिधि बुधबार आ–आफ्नो मौलिक पहिरनमा कार्यालय आउने गरेका छन् । गाउँपालिका र पालिका भित्रका सबै सरकारी कार्यालयमा कार्यरत कर्मचारी, शिक्षक, शिक्षिका, विद्यार्थी, विद्यालय कर्मचारी सबैले हरेक हप्ताको बुधबार आ–आफ्नो जातअनुसारको पहिरन लगाउने गरेका छन् ।
सांस्कृतिक पहिरनमा विद्यालय सञ्चालन गर्ने गाउँपालिकाको शिक्षा ऐन, २०७८ अनुसार पालिकाका २२ वटै सामुदायिक विद्यालय र दुईवटा निजी विद्यालयमा बुधबार–बुधबार मौलिक पहिरन अनिवार्य लागू गरिएको छ ।
जातीय पहिचानका रूपमा लिइने पहिरनलाई म्यागङको परिचयका रुपमा स्थापित गराउँदै मौलिक परम्परागत पोशाक लगाउने र त्यसका बारेमा बालबालिकालाई समेत जानकारी गराउने उद्देश्यले आफैंबाट त्यसको सुरुवात गर्दै पालिका भित्र हप्तामा १ दिन अनिवार्य परम्परागत पोशाक लगाउने नियम लागू गरिएको गाउँपालिकाका अध्यक्ष आशा तामाङले अनलाइन सरोकारसँग बताए ।
पालिकाले कम्तीमा हप्तामा १ दिन अनिवार्य मौलिक पहिरन लगाउन मातहतका जनप्रतिनिधि कर्मचारी र विद्यालयका शिक्षक, विद्यार्थीलाई निर्देशन दिँदै पालिकाबासी नागरिकलाई समेत परम्परागत पहिरनमा सजिन अनुरोध गरेसँगै अहिले म्यागङका सार्वजनिक कार्यक्रम, चाडपर्व, मेला, महोत्सव र घुमफिर जानेले समेत आधुनिक पोशाक भन्दा मौलिक पहिरन लगाउने बानी बसेको छ ।
