पाँचथरको फाल्गुनन्द गाउँपालिकाले सबै नागरिकलाई स्वास्थ्य बीमाको पहुँचमा ल्याउने भएको छ । नेपाल सरकारको राष्ट्रिय कार्यक्रम स्वास्थ्य बीमाको पहुँचमा पालिकाबासी नागरिकलाई समेट्ने र उपचारमा सुविधा दिने गरी फाल्गुनन्दले कार्यक्रम सञ्चालन गरेको हो ।
प्रत्येक आर्थिक वर्षमा एउटा वडाको ३५ घरधुरीलाई पालिकाले बीमा गरिदिने गरेको र विपन्न नागरिकको उपचार कोषबाट सहयोग लिनेलाई अनिवार्य बीमा कार्यक्रममा समेट्ने गरिएको गाउँपालिका अध्यक्ष बृज हाङ आङदेम्बेले अनलाइन सरोकारसँग बताए । बीमा र पालिका आन्तरिक कार्यक्रमहरुको प्रभावले फाल्गुनन्दको स्वास्थ्य सेवामा सुधार आएको अध्यक्ष आङदेम्बेको भनाई छ ।
पालिकाले स्वास्थ्य बीमा गराएका विपन्न नागरिहले उपचारमा छुट सुविधा लिएपछि अन्य स्थानीयले स्वस्फर्त बीमा गराउन थालेका छन् ।
स्वास्थ्य बीमा लागू भएका क्षेत्रका स्थानीयले एक पटक बीमा गर्ने र वार्षिक नविकरण गरेर स्वास्थ्य उपचारमा छुट सेवा लिइरहेका छन् ।
