तुइन चुँडिदा महाकाली नदीमा खसेर एकजना बेपत्ता भएका छन् । दार्चुलाको व्याँस गाउँपालिका–२, दुम्लिङस्थित तुइनबाट मंगलबार (असार ३१) महाकालीमा खसेर स्थानीय २८ वर्षीय नारायण बुढाथोकी बेपत्ता भएका हुन् ।
दिउँसो १२ बजे दुम्लिङबाट महाकाली तरेर भारततर्फ जाने क्रममा बुढाथोकी तुइन चुँडिदा नदीमा बेपत्ता भएका जिल्ला प्रहरी कार्यालयका प्रहरी निरीक्षक छत्रबहादुर रावतले जानकारी दिए ।
उनीसँगै स्थानीय २६ वर्षीय जितु बिष्ट र ४५ वर्षीय जयदु बुढाथोकी पनि तुइनमार्फत महाकाली नदी पार गर्न गएका थिए । नारायणभन्दा अघि जितु तुइनमार्फत महाकाली सकुशल पार गरी भारततर्फ गएका थिए । त्यसपछि महाकाली पार गर्ने क्रममा नारायण नदीको बीचभागमा पुगेपछि तुइन चुँडिदा बेपत्ता भएका प्रहरीले जनाएको छ ।
उक्त घटनापछि जितु र नारायणसँगै गएका जयदुले भने तुइन चढ्न पाएनन् । स्थानीयवासी र प्रहरीले बेपत्ता नारायणको खोजी गरिरहेको प्रहरी निरीक्षक रावतले बताए ।
