सोलुखुम्बु जिल्लाको नेचासल्यान गाउँपालिकाले आगामी आर्थिक वर्ष २०८२-८३ का लागि ५२ करोड १ लाख २० हजार ८ सय ८३ रुपैयाँको बजेट विनियोजन गरेको छ।
१७ औँ गाउँसभामा गाउँपालिका उपाध्यक्ष विना राईले प्रस्तुत गर्नुभएको बजेट अनुसार चालु खर्चतर्फ ३८ करोड ९ लाख ८० हजार ९ सय ४१ र पुँजीगत खर्चतर्फ १३ करोड ९१ लाख ३९ हजार ९ सय ४२ रुपैयाँ छुट्याइएको छ।
यसपालिको बजेट चालु आर्थिक वर्षको तुलनामा करिब ४ करोडले वृद्धि भएको गाउँपालिकाले जनाएको छ।
गाउँपालिका अध्यक्ष तथा गाउँसभा अध्यक्ष धनजन राईको अध्यक्षतामा सम्पन्न गाउँसभाबाट आगामी वर्षका लागि बजेट, नीति तथा कार्यक्रम पारित गरिएको हो।
संघीय र प्रदेश सरकारको सहयोग
गाउँपालिकाको कुल आयको स्रोत विवरण अनुसार संघीय सरकारबाट सशर्त अनुदान २३ करोड ९१ लाख, वित्तीय समानीकरण अनुदान १० करोड ९७ लाख, राजस्व बाँडफाँड ६ करोड ५१ लाख ६९ हजार ७ सय ४१, समपूरक अनुदान १ करोड २२ लाख, र विशेष अनुदान ३ करोड ९० लाख रहेको छ।
प्रदेश सरकारतर्फ सशर्त अनुदान ३ करोड ८ लाख २६ हजार, वित्तीय समानीकरण अनुदान १ करोड ७ लाख ५४ हजार, राजस्व बाँडफाँड ४३ लाख २९ हजार, र प्रदेश समपूरक अनुदान १ करोड २० लाख रुपैयाँ रहने अनुमान गरिएको छ।
आन्तरिक स्रोत र अन्य आय
गाउँपालिकाले मालपोत रजिष्ट्रेशनबाट २ लाख ५० हजार, अन्य आन्तरिक आयबाट ६३ लाख ५० हजार, संस्थागत अनुदानबाट ५९ लाख ४२ हजार १ सय ४२, र चालु आर्थिक वर्षबाट सञ्चित कोषबाट १ करोड १५ लाख रुपैयाँको आय अनुमान गरेको छ।
गाउँपालिकाले यो बजेट माध्यमबाट स्थानीय पूर्वाधार, शिक्षा, स्वास्थ्य, कृषि, रोजगारी, वातावरण तथा सामाजिक विकासजस्ता क्षेत्रमा प्राथमिकता दिने जनाएको छ ।
