बंगलादेशमा वायुसेनाको विमान विद्यालय भवनमा ठोक्किएर दुर्घटना भएको छ । राजधानी ढाकाको उत्तरा क्षेत्रमा बंगलादेशी वायुसेनाको एफ ७ लडाकु विमान दुर्घटनामा परेको हो ।
घटना स्थानीय समयअनुसार सोमबार १ बजेर १८ मिनेट जाँदा भएको हो ।
बंगलादेशको ढाका ट्रिब्युन अनलाइनका अनुसार उक्त विमान माइलस्टोन स्कुल तथा कलेजको भवनमा ठोक्किएको हो । उक्त विमान ठोक्किएको भवनमा स–साना बालबालिका अध्ययन गर्दै आएको ढाका ट्रिब्युनले उल्लेख गरेको छ ।
यद्यपि विमान ठोक्किएका बेला भवनमा पठनपाठन भइसकेको दाबी गरिएको छ । विमान ठोक्किएको भवनमा आगलागी भएको जनाइएको छ ।
घटनामा भएको मानवीय क्षतिको विवरण भने आइसकेको छैन । हाल घटनास्थलमा उद्धारका लागि उत्तरा, टोङ्गी, पल्लबी, कुर्मितोला, मिरपुर र पूर्वाञ्चलका अग्निसेवा खटाइएको छ ।
सामाजिक सञ्जालमा सार्वजनिक भएका भिडियोमा दुर्घटनामा परी केही व्यक्ति घाइते भएको देखाइएको छ । उनीहरुलाई उत्तरा आधुनिक अस्पताल लगिएको बताइएपनि यसको स्वतन्त्र पुष्टि भने भइसकेको छैन ।
प्रत्यक्षदर्शीले विमान एक्कासी भवनमा ठोक्किएको र ठूलो आवाज आएको जानकारी दिएका छन् । घटनापछि विद्यालय परिसरमा विद्यार्थी र शिक्षक कर्मचारीमाझ भागदौड मच्चिएको थियो ।
