कोसी प्रदेशका सभामुख अम्बरबहादुर विष्टले विराटनगर प्रदेश राजधानी भएर पनि पछि परेको बताएका छन् । मंगलबार कोसी प्रदेशसभा सचिवालयमा संसदीय मामिला पत्रकारहरूसँगको कुराकानीका क्रममा सभामुख विष्टले विराटनगरमा देखाउन लायक एउटा पनि ठाउँ नभएको उल्लेख गरे ।
‘‘राजधानी त बनाएका छौँ तर बाहिरबाट पाहुना आउँदा घुमाउन र देखाउन लायक एउटा ठाउँसमेत छैन,’’ उनले भने, ‘‘ऐतिहासिक पक्षलाई समेट्दै सहरी विकासमा प्रदेश सरकार र महानगरले पनि काम गर्नुपर्छ ।’’
विष्टले विराटकालीन इतिहासलाई पुनर्जीवित गर्न सरकारले काम गर्नुपर्ने सुझाव दिए । उत्खनन्का क्रममा फेला परेको विराट क्षेत्रलाई संरक्षण, प्रचार र हेर्न लायक बनाएमात्र पनि धेरै पर्यटक विराटनगर ल्याएर उनीहरूको बसाइ लम्ब्याउन सकिने विष्टले सुझाव दिए ।
‘‘दरबार क्षेत्र घुम्न आएका मानिसलाई पर्यटकीय सर्किट बनाएर सुनसरीको बर्जुताल लगेर केहीबेर अल्मल्याउन पनि सकिन्छ,’’ विष्टले भने ।
उनले धेरैले दार्जिलिङ, इलाम र कन्याम बस्ने योजनासाथ आउने गरेको तर विराटनगर प्राथमिकतामा नपर्ने गरेको सुनाए । झापा र सुनसरीमा रहेका धार्मिक क्षेत्रलाई विराटनगरसँग जोड्ने योजनासाथ काम गर्नुपर्ने सभामुख विष्टको सुझाव छ ।
विष्टले प्रदेशसभाको अबको बैठकमा प्रदेशसभामा प्रदेशसभा सदस्यहरूले दर्ता गराएको गैरसरकारी विधेयक टेबुल गर्ने बताए ।
