अनशनरत खोटाङको दिक्तेल रूपाकोट मझुवागढी नगरपालिकाका मेयर तीर्थराज भट्टराईले आफूलाई माइतीघरमै पुर्याइदिन भनेपछि वीर अस्पतालमा उनी र चिकित्सकबीच विवाद भएको छ । उनको स्वास्थ्य अवस्था कमजोर बन्दै गएको अवस्थामा अस्पतालबाट पठाउन नमिल्ने भन्दै चिकित्सकले ‘डिस्चार्ज’ नगरेका हुन् ।
उनले बुधबार (साउन १४) देखि काठमाडौंको माइतीघरमा आमरण अनशन सुरु गरेका थिए । बुधबारै राति करिब १० बजे प्रहरीले उनलाई वीर अस्पताल पुर्याएको थियो ।
उनको स्वास्थ्य जाँच गर्दा प्रेसर घट्दै गएको खुलेको छ । मेयरका तर्फबाट वार्ता समितिका सदस्य एवं दिक्तेल रूपाकोट मझुवागढी–१२ का वडाध्यक्ष दानबहादुर राईले विवाद उत्पन्न भएको बताए ।
तीनदिने सत्याग्रहपश्चात् पनि माग सम्बोधन नभएपछि मेयर भट्टराईले बुधबारदेखि आमरण अनशन थालेका थिए । सातबुँदे माग राखेर गएको आइतबारदेखि उनले सत्याग्रह थालेका थिए ।
मेयर भट्टराईले हिमाल र प्रकृति जोगाउनुपर्ने, बाँसका सामग्री प्रयोग गर्न नीति बनाउनुपर्ने, बाँदर व्यवस्थापन गर्नुपर्ने, स्थानीय उत्पादन प्रवर्द्धन गर्नुपर्नेलगायत माग गरेका छन् । मेयर भट्टराईले आफ्ना माग पूरा नभए देहत्याग गर्ने समेत घोषणा गरेका थिए ।
