उदयपुरको त्रियुगा नगरपालिका–७, चुहाडेमा जन्मदिनको भोज खाएपछि २७ जना बिरामी परेका छन् ।
स्थानीय जितेन्द्र राईको घरमा बिहीबार साँझ आयोजना गरिएको भोजमा सहभागी भएकाहरुमा पेट दुख्ने समस्या देखिएपछि उनीहरुलाई जिल्ला अस्पताल गाईघाटमा भर्ना गरिएको हो ।
बिरामीहरूमा एक्कासी झाडापखाला लाग्ने, वान्ता हुने र पेट दुख्ने जस्ता साझा लक्षणहरू देखिएका छन।
अस्पतालका सूचना अधिकारी सुरेशकुमार पाण्डेले खाना विषाक्त (फुड प्वाइजनिङ) भएका कारण ठूलो संख्यामा मानिसहरू एकैपटक बिरामी परेको बताएका छन् ।
भोजमा रोटी, पुरी, अचार, बुनियाँ, पुवा जस्ता परिकार थिए । जिल्ला प्रहरी कार्यालय, उदयपुरका अनुसार बिरामी पर्नेहरूमा ११ जना महिला, ३ जना पुरुष, ८ जना बालिका र ५ जना बालक रहेका छन् ।
प्रहरी प्रमुख एसपी हरिहरनाथ योगीले घटनाको जानकारी पाउनासाथ सबै बिरामीलाई राति नै अस्पताल पुर्याइएको जानकारी दिए ।
