ओखलढुंगाको खिजीदेम्बा गाउँपालिकाले काठमाडौंमा बसोबास गर्ने आफ्ना सेवाग्राहीका लागि तीन दिने विशेष एकीकृत प्रशासनिक शिविर सुरु गरेको छ । कोशी प्रदेश सभा सदस्य प्रदिप कुमार सुनुवारको प्रमुख आतिथ्यतामा र गाउँपालिका अध्यक्ष गम्बु शेर्पाको अध्यक्षतामा जोरपाटीस्थित शेर्पा पार्टी प्यालेसमा आज उक्त कार्यक्रमको उद्घाटन गरिएको हो ।
शिविरमा जन्म, मृत्यु, विवाह, सम्बन्धविच्छेद, बसाइँसराइ दर्ता, सामाजिक सुरक्षा भत्ता दर्ता तथा नवीकरण, मालपोत र नापीसँग सम्बन्धित सेवा, साथै वडा कार्यालयमार्फत प्रदान गरिने अन्य सेवाहरू उपलब्ध गराइने छन् ।
गाउँपालिका अध्यक्ष गम्बु शेर्पाले काठमाडौंमै शिविर सञ्चालन गरेर राजधानीमा रहेका सेवाग्राहीलाई सहज र छिटो सेवा उपलब्ध गराउनु मुख्य उद्देश्य भएको बताए । कार्यक्रममा उपाध्यक्ष सुसिला तामाङ, पूर्वमन्त्री प्रदीप कुमार सुनुवार, नेपाल सरकारका उपसचिव, प्रसाशकिय अधिकृत, अडाका अध्यक्ष लगायत सेवाग्राहिको बाक्लो उपस्थिति रहेको थियो ।
सेवाग्राहीको सम्पुर्ण कार्य सम्पन्न नभएसम्म काठमान्डौँमै बसेर शिविरलाई निरन्तरता दिइने उपाध्यक्ष सुसिला तामाङले बताए । पूर्वमन्त्री प्रदिप कुमार सुनुवारले यो पहलले नागरिकलाई संघीय शासन प्रणालीको वास्तविक अनुभव दिलाएको बताए ।
सेवाग्राहीहरूले वर्खाको समयमा गाउँ जानुपर्ने झन्झट घटेको भन्दै गाउँपालिका र जनप्रतिनिधिलाई धन्यवाद दिए ।
शिविरको अवसरमा गाउँपालिकाले प्रगतिको प्रतिवेदनसमेत सुनाएको थियो । सेवाग्राहीसँग पालिकाको सेवा प्रवाह तथा समृद्धिका लागि भएका पहलका बारेमा जानकारी दिइने र सुझाव लिइने गाउँपालिकाले जनाएको छ ।
