जुम्ला जिल्लाको पातारासी गाउँपालिका वडा नम्बर २ मा अवस्थित देवस्थल मन्दिर पर्यटकको पर्खाइमा रहेको छ । विकट भौगोलिक अवस्थिति भए पनि धार्मिक तथा ऐतिहासिक दृष्टिले अत्यन्तै महत्वपूर्ण मानिने यस मन्दिरमा वार्षिक रूपमा हजारौं भक्तजनको आवागमन हुने गर्दछ ।
बाटो अप्ठ्यारो र पूर्वाधार अभावका कारण अपेक्षित संख्यामा आन्तरिक तथा बाह्य पर्यटक आकर्षित गर्न सकिएको छैन । स्थानीय तहदेखि प्रदेश सरकारसम्मले धार्मिक पर्यटन प्रवद्र्धनमा प्राथमिकता दिन जरुरी रहेको बताउँदै, “उचित पूर्वाधार विकास र प्रचारप्रसार भए देवस्थल मन्दिर राष्ट्रियस्तरको प्रमुख धार्मिक गन्तव्य बन्न सक्ने देवस्थल पर्यटन बोर्डका सचिव अमृत बहादुर बुडाले अनालाइन सरोकारलाई बताउनु भयो ।
मन्दिरसँग सम्बन्धित धार्मिक विश्वास अनुसार यहाँ पूजा–अर्चना गरे मागेका मनोकामना पूरा हुने जनश्रुति छ । यही कारण विशेष गरी शिवरात्रि र साउने पूर्णिमा का अवसरमा यहाँ भव्य मेला लाग्ने गर्दछ । ती अवसरमा जुम्ला मात्र नभई कर्णाली प्रदेशका विभिन्न जिल्लाबाट श्रद्धालु भक्तजनहरूको ठूलो भीड लाग्ने गर्दछ ।
स्थानीय बासिन्दाले पनि देवस्थल मन्दिरलाई धार्मिक पर्यटनसँगै सांस्कृतिक र आर्थिक समृद्धिको आधार बनाउन सकिने विश्वास व्यक्त गरेका छन् । उनीहरूका अनुसार पर्यटकका लागि सहज यातायात, आवास सुविधा र प्रचारप्रसारमा जोड दिइने हो भने यस क्षेत्रको विकासले गति लिन सक्नेछ ।
देवस्थल मन्दिरलाई कर्णाली प्रदेशको प्रमुख धार्मिक–पर्यटन स्थल बनाउन सरकार र सरोकारवाला निकायहरूको ध्यानाकर्षण आवश्यक देखिन्छ ।
