सिन्धुली । सिन्धुलीमा ५० बेड क्षमताको आईसोलेशन भवन निर्माणको कामलाई तीब्र गतिमा अघि बढाएको छ । विश्वव्यापी रुपमा फैलिएको कोरोना भाईरसको जोखिमलाई लक्षित गरी जिल्लाको कमलामाई नगरपालिका–६ शिवनगरमा ५० बेड क्षमताको आईसोलेशन भवन निर्माणको काम अघि बढाएको हो ।
ट्रष्ट राखेर ईटाको गाह्रो जोडेर बनाईने आईसोलेसन भवन विश्व स्वास्थ्य संगठनको मापदण्ड बमोजिमको हुने र तीन वटा आईसियु बेड हुने सिन्धुली अस्पताल विकास समितिका अध्यक्ष प्रल्हादकुमार पोखरेलले बताए । उनका अनुसार तीन करोड ३६ लाखको लागतमा भवन बन्ने छ । आईसोलेशन भवनको कुल लागत मध्ये रु ९७ लाख सामाजिक विकास मन्त्रालय बागमति प्रदेशले सहयोग गर्ने छ ।
आईसोलेसन भवन जिल्ला अस्पताल मातहत सञ्चालन हुने अस्पताल विकास समितिले जनाएको छ । भवन निर्माणका लागि जिल्लाका सरोकारवालाहरुको भेलाले निर्माण समिति र अनुगमन समिति बनाएको छ । पछिल्लो समयमा जिल्लामा कोरोना संक्रमणका बिरामी थपिँदै गएपछि आईसोलेशन भवन निर्माण गर्न सबैले चासो दिएका हुन् ।
