बागलुङको तमानखोला गाउँपालिकामा बसोबास गर्ने सेर्पाली परिवार हाल अत्यन्तै तनावमा परेका छन् । परिवारकी १४ वर्षीया छोरी मिना सेर्पाली विगत लामो समयदेखि मुटुको गम्भीर समस्याबाट पीडित रहेकी छन् । उनको मुटुमा सानो उमेरमै कृत्रिम हार्ट भल्भ जडान गरिएको थियो । उमेर बढ्दै जाँदा यस किसिमको उपकरणलाई चिकित्सकले तोकेको समय अनुसार फेरबदल गर्नुपर्ने हुन्छ ।
तर, उपकरण फेर्ने प्रक्रिया निकै खर्चिलो हुने भएकाले परिवार ठूलो आर्थिक संकटमा परेको छ । चिकित्सकहरूको अनुसार मिना सेर्पालीलाई जडान गरिएको कृत्रिम मुटु भल्भ परिवर्तन गर्न नेपालका ठूला अस्पतालहरूमा कम्तीमा ८ देखि १२ लाख रुपैयाँसम्म खर्च लाग्ने अनुमान गरिएको छ ।
पीडितकी आमा धनकुमारी सेर्पालीले अनलाइन सरोकारसँग कुरा गर्दै आँखा रसाउँदै भनिन्
“छोरीको उपचारका लागि अहिलेसम्म जे–जति कमाइ थियो सबै खर्च भइसकेको छ । अब त काठमाडौसम्म जानको लागि गाडीभाडा पनि छैन । पढाइ लेखाइ पनि कम भएकाले कसलाई कहाँ गुनासो गर्ने भन्ने थाहा छैन । बुबा र दाइ मजदुरी गरेर ल्याएको पैसाले घर चलाउनै गाह्रो भएको छ ।”
धनकुमारीले छोरीको जीवन बचाउन सहयोगको अपिल गर्दै आमा भएर चित्त दुखाएको प्रष्ट पारिन् ।
मिना सेर्पालीको जीवन बचाउन समयमै मुटुको हार्ट भल्भ उपकरण परिवर्तन गर्नु आवश्यक छ । तर, परिवारको आर्थिक अवस्था नाजुक भएकाले समाजका दयालु व्यक्ति, संस्था वा संघसंस्थाले सहयोगको हात बढाउने हो भने मात्र उनको उपचार सम्भव हुनेछ ।
