काठमाडौं । बार्सिलोनाका कप्तान लियोनल मेस्सीले क्याम्प नाउमा प्रशिक्षण गर्न भने नछोड्ने भएका छन् । उनले बार्सिलोनाबाट स्थानान्तरण नहुन्जेलसम्म क्लबको प्रशिक्षणमा सहभागिता जनाउने बताएका हुन् ।
अर्जेन्टिनी स्ट्राइकर मेस्सीले यसअघि आफूले क्लब छोड्न चाहेको बताउँदै आएका छन् । मेस्सीले स्थानान्तरणको सहज प्रक्रियाका लागि आफु प्रशिक्षणमा सामेल हुने बताएका हुन् ।
यूईएफए च्याम्पियन्स लिग फुटबलको क्वाटरफाइनलमा जर्मन च्याम्पियन बार्यन म्युनिखसँग ८–२ को लज्जास्पद हार पछि उनले क्लब छोड्ने निर्णय गरेको विषय बाहिरिएको थियो ।
दुई दशक लामो आफ्नो बार्सिलोना बसाइ यस सिजनदेखि अन्त्य गर्ने उनले घोषणा गरेका थिए ।
उनले औपचारिक रुपमा क्लब नछाडेसम्म क्लबका अन्य क्रियाकलापमा भने सहभागिता जनाउने छन् । उनले यस अवधिका क्लबले कुनै खेल खेल्दा खेलका लागि समेत उपस्थित हुने बताएका छन् । मेस्सीले औपचारिक रुपमा क्लब नछाडेसम्म क्लबको सबै योजनामा सामेल हुने निर्णय गरेका हुन् । -एजेन्सी
