भारतको राजधानी दिल्लीका अधिकांश क्षेत्रहरूमा बुधबार बिहान वायुको अवस्था खराबदेखि अत्यन्त खराबसम्म रेकर्ड गरियो ।
केन्द्रीय प्रदूषण नियन्त्रण बोर्ड (सीपीसीबी)का अनुसार, बुधबार बिहान ७ बजे आरके पुरम, आनन्द विहार, अशोक विहार, बवाना, अक्षरधाम र आईटीओ लगायतका क्षेत्रहरूमा वायु गुणस्तर सूचकांक ३०० भन्दामाथि रह्यो, जुन अत्यन्त खराब श्रेणीमा पर्दछ ।
यसैगरी, इन्डिया गेट र नेहरू नगर जस्ता क्षेत्रहरूमा एक्यूआई ३०० भन्दा तल रह्यो, जुन खराब श्रेणीमा आउँछ ।
दिल्लीमा प्रदूषणबाट राहत पाउनका लागि मंगलबार, अक्टोबर २९ तारिखमा दुई पटक ‘क्लाउड सिडिङ’ (कृत्रिम वर्षाको प्रयास) गरिएको थियो ।
दिल्लीका वातावरणमन्त्री मनजिन्दर सिंह सिरसाले यसको जानकारी दिँदै आईआईटी कानपुरको टोलीलाई उद्धृत गर्दै आगामी केही घण्टाभित्रै दिल्लीमा जुनसुकै बेला पनि वर्षा हुन सक्ने भनेका थिए । यद्यपि, सञ्चारमाध्यमका रिपोर्टहरू अनुसार, त्यो प्रयासपछि पनि दिल्ली–एनसीआरका कतै पनि वर्षा भएन ।
दिल्ली सरकारले आईआईटी कानपुरसँग मिलेर क्लाउड सिडिङको परीक्षण गरेको थियो । आईआईटी कानपुरका निर्देशक मनिन्द्र अग्रवालले इन्डिया टुडेसँग कुरा गर्दै क्लाउड सिडिङपछि वर्षा नभए पनि, यसले उनीहरूलाई आवश्यक डेटा संकलन गर्न मद्दत गर्यो । जसले भविष्यमा कृत्रिम वर्षाका लागि गरिने क्लाउड सिडिङ’ लाई अझ प्रभावकारी बनाउन सकिने बताएका छन् ।
