काठमाडौं । कोरोना संक्रमण रोकथाम तथा न्युनिकरणका लागि हाल देशका ४९ जिल्लाले निषेधाज्ञा जारी गरेका छन् । ३९ जिल्लामा पूर्ण तथा १० जिल्लामा आंशिकरुपमा निषेधाज्ञा जारी गरिएको गृह मन्त्रालयले जनाएको छ ।
जिल्लामा संक्रमणको अवस्थालाई हेरेर आंशिक तथा पूर्णरुपमा निषेधाज्ञा जारी भएको गृहमन्त्रालयका सुचना अधिकारी प्रेमलाल लामिछानेले जानकारी दिए ।
पूर्ण निषेधाज्ञा भएका जिल्लामा उपत्यकाका तीन जिल्ला काठमाडौं, ललितपुर र भक्तपुरसहित सप्तरी, धनुषा, पर्सा, महोत्तरी, बारा, सुनसरी, सर्लाही, स्याङजा, सिरहा लगायतका रहेका छन् ।
पछिल्लो केहि दिनयता निषेधाज्ञा जारी गर्ने जिल्लाको संख्या कम भएको छ । यसअघि ५१ जिल्लामा निषेधाज्ञा जारी गरिएकोमा गुल्मी, पाँचथर र कालिकोटमा निषेधाज्ञा हटाइएको छ ।
सरकारले जिल्ला तथा विभिन्न स्थानीय तहमा निषेधाज्ञा लगाउन सक्ने अधिकार जिल्ला प्रशासन कार्यालयलाई दिएको छ ।
