तपाईं अनुमान गर्न सक्नु हुन्छ ? मानिस कतिपल्ट अपराध गर्छ र जेल बस्छ ? एक पटक, दुई पटक, पाँच पटक ।
तर, यत्तिमात्रै होइन नुवाकोटका २८ वर्षीय दीपक गजुरेल २३औँ पटक पक्राउ परेका छन्, त्यो पनि एउटै प्रकृतिको अपराध गरेको गजुरेललाई प्रहरी वृत्त गौशालाको विशेष टोलीले शुक्रबार सिनामंलगबाट पक्राउ गरेको हो ।
प्रहरीका अनुसार गजुरेलले बुधबार सिनामंलगस्थित राजश्री बचत तथा ऋण सहकारी संस्थाको कार्यालय तोडफोड गरेर लुटपाट गरेका थिए । प्रहरीको विशेष टोलीले सहकारीको कार्यालय तथा आसपासका सीसीटीभी फुटेजका आधारमा सहकारी लुट्ने गजुरेलाई पहिचान गरेर पक्राउ गर्न सफल भएको हो ।
पक्राउ परेका गजुरेलमाथि अनुसन्धान गर्दा भने प्रहरी नै चकित परेको छ । अनुसन्धानका क्रममा गजुरेल सहकारी लुटपाटका ‘नटवरलाल’ नै भएको खुलेको छ । काठमाडौं प्रहरीका एसपी पवन भट्टराइका अनुसार गजुरेलले काठमाडौं–पोखरालगायतका सहरका विभिन्न १९ वटा सहकारी लुटेको खुलेको हो ।
यो बाहेक अन्य अपराध गरेर २२ वटा मुद्दा गजुरेलविरुद्ध चलेको खुलेको छ । प्रहरीको अनुसन्धानका क्रममा गजुरेल सहकारी लुटपाट गरेकै अभियोगमा पुर्पक्षका लागि थुनामा थिए । भदौ २४ गतेको जेनजी प्रदर्शनमा भने गजुरेल सुन्धारा कारागारबाट भागेको खुलेको छ ।
यसरी परे पक्राउ ?
प्रहरीले २३औँ पटक पक्राउ गरेका दीपक गजुरेल सहकारी लुटपाटमा एक्लै जाने र लुट्ने गरेको प्रहरीको दाबी छ । बुधबार सिनामंगलको राज श्री सहकारी लुट्नसमेत गजुरेल एक्लै पुगेका थिए । प्रहरीका अनुसार गजुरेलले सहकारी राति १२ः४५ मा लुटेका थिए ।
सहकारीका सञ्चालकले सहकारीको १६ लाख रुपैयाँ लुटिएको उजुरी प्रहरीमा दिएपछि अनुसन्धान थालेको थियो । अनुसन्धानका क्रममा प्रहरीले सहकारी लुटपाटमा गजुरेल रहेको खुलेपछि खोजी थालेको हो । प्रहरीले सहकारी लुटिएको दुई दिनमै गजुरेलाई पक्राउ गर्न सफल भएको हो ।
प्रहरीले गजुरेले सहकारी लुटेको १० लाख २३ हजार पाँचसय रुपैयाँसमेत बरामद गरेको छ । प्रहरीका अनुसार गजुरेलले सहकारीको रकम लुटेर लगेज ठमेलस्थित होटल लोटस ग्रान्ड होटलमा राखेका थिए ।
आफू भने प्रेमीसहित गौशालाको एक होटलमा बस्दै आएका थिए । प्रहरीले सिनामंलगबाट पक्राउ गर्दा गजुरेलको साथबाट २३ हजार ५०० रुपैयाँमात्रै फेला पारेको थियो । बाँकी रकम आफूले खर्च गरेर सकिएको बयान प्रहरीलाई दिएका थिए ।
तर, प्रहरीले गजुरेलकी प्रेमीकालाई समेत पक्राउ गरेपछि भने सहकारीबाट लुटेको रकम ठमेलको होटलमा राखेको पत्ता लागेको हो । प्रहरीको अनुसन्धानका क्रममा सहकारी लुटेपछि गजुरेलले काठमाडौं र पोखराका महंगा होटलहरुमा प्रेमी लिएर बस्ने गरेको खुलेको हो ।
कसरी लुट्थे सहकारी ?
प्रहरीका अनुसार गजुरेल लामो समयदेखि सहकारी ठगी धन्दामा सक्रिय थिए । उनी चलायमान हुने सहकारीबारे दिउँसै रेकी गर्न हिँड्ने र रातिमात्रै लुटपाट गर्ने गरेको अनुसन्धानबाट खुलेको छ । प्रहरीको अनुसन्धानका क्रममा गजुरेलले रातिको १२ बजेदेखि २ बजेसम्म सहकारी लुट्ने गरेको देखाएको छ ।
सहकारीको रकम लुटेर विभिन्न फिल्म तथा म्युजिक भिडियोहरुमासमेत उनले लगानी लगाउने गरेको प्रहरीको दाबी छ ।
