राष्ट्रिय स्वतन्त्र पार्टी (रास्वपा)का वरिष्ठ नेता बालेन्द्र शाह (बालेन) झापा आसपासका पूर्वी जिल्ला पुग्ने भएका छन् । आउँदो फागुन २१ गते हुने प्रतिनिधिसभा सदस्य निर्वाचनका निम्ति उमेदवारी दर्ता गराउन झापा क्षेत्र नम्बर–५ पुगेका उनी भेटघाट गर्न पूर्वी जिल्ला जान लागेका हुन् ।
ती जिल्ला भ्रमण र भेटघाटपछि उनी केही दिनमा काठमाडौं फर्कने बालेनको सचिवालयका एक सदस्यले बताए । “बालेन दाइले आज बिहानैदेखि झापाका स्थानीय बासिन्दासँग भेटघाट गरिरहनुभएको छ । केही दिन झापा आसपासका पूर्वी जिल्लामा जानुहुन्छ । त्यसपछि पुनः झापा आएर दुई–तीन दिनमै काठमाडौं फर्किनुहुन्छ,” ती सदस्यले भने ।
मंगलबार (माघ ६) बिहान बालेन उमेदवारी दर्ता गराउन झापा–५ पुगेका थिए । उनी नेकपा (एमाले)का अध्यक्ष केपी शर्मा ओलीलगायत उमेदवारसँग चुनाव लड्दै छन् ।
