नेपाल विद्युत प्राधिकरण अन्तर्गतको सल्यान वितरण केन्द्रमा सोमबार साँझ एक असामान्य घटना देखियो। कार्यालय समय सकिनै लाग्दा कर्मचारीहरू घर फर्कने तयारीमा थिए, तर त्यही बेला एक वडाध्यक्ष भने विद्युत मिटर माग्दै कार्यालय परिसरमै धर्ना बसे।
सल्यान जिल्ला स्थित वितरण केन्द्रमा कपुरकोट गाउँपालिका–३ का वडाअध्यक्ष प्रदीप खड्का तीन जना सेवाग्राहीका लागि विद्युत मिटर लिन पुगेका थिए। आवश्यक सम्पूर्ण कागजी प्रक्रिया पूरा गरेपछि पनि कर्मचारीबाट मिटर उपलब्ध नहुने जवाफ पाएपछि उनले तत्कालै फर्कने निर्णय गरेनन्।
सेवाग्राहीहरूलाई पुनः अर्को दिन आउनुपर्ने बाध्यता नपरोस् भन्ने उद्देश्यले वडाध्यक्ष खड्काले विरोधस्वरूप कार्यालय परिसरमै धर्ना बस्ने निर्णय गरे। ग्रामीण भेगबाट सदरमुकामसम्मको यात्रा खर्चिलो र समयसाध्य हुने भएकाले ‘आज होइन, भोलि’ भन्ने जवाफ आफूलाई स्वीकार्य नभएको उनले बताए।
साँझ करिब ५ बजेदेखि सुरु भएको उनको धर्ना राति अबेरसम्म जारी रह्यो। अँध्यारो बढ्दै जाँदा पनि उनी आफ्नो अडानबाट पछि हटेनन्। अन्ततः मिटर उपलब्ध गराउनुपर्ने माग राख्दै उनले कार्यालय परिसरमै झोलालाई सिरानी बनाएर रात बिताए।
स्थानीयस्तरमा जनप्रतिनिधिले सेवाग्राहीको हकका लागि यसरी प्रत्यक्ष दबाब सिर्जना गरेको घटनालाई धेरैले सकारात्मक रूपमा लिएका छन् भने सम्बन्धित निकायको सेवा प्रवाहप्रति प्रश्नसमेत उठेको छ।
