काठमाडौं । राष्ट्रपति विद्यादेवी भण्डारीले आफ्नो सूचना तथा सञ्चार विज्ञ सल्लाहकारमा टीका ढकाललाई नियुक्त गरेकी छन् । ढकाल आइतबार, २१ भदौदेखि लागू हुनेगरी राष्ट्रपतिको विज्ञ सल्लाहकारमा नियुक्त भएका हुन् ।
उनलाई सूचना र सञ्चार विज्ञ सल्लाहकारसँगै तोकिएका अन्य जिम्मेवारीसमेत पूरा गर्न राज्यमन्त्री सरहको सेवासुविधा पाउनेगरी नियुक्त गरिएको राष्ट्रपति कार्यालयले जनाएको छ ।
कूटनीतिक क्षेत्रमा समेत काम गरेका ढकालले पछिल्लो समय राजनीति र अन्तर्राष्ट्रिय सम्बन्धका विषयमा स्तम्भ लेख्दै आएका थिए ।
राष्ट्रपतिका प्रेस सल्लाहकार रहेका माधव शर्मा केही समयअघि त्यो जिम्मेवारीबाट विदा भएका थिए ।