राजस्थान रोयल्स युएईमा जारी १३ औं संस्करणको इन्डियन प्रिमियर लिग (आईपीएल) क्रिकेटको प्लेअफमा पुग्न असफल भएको छ ।
दुबईमा गएराति भएको समूह चरणको अन्तिम खेलमा कोलकाता नाइट राइडर्ससँग ६० रनले पराजित भएपछि राजस्थान आईपीएलबाट बाहिरिएको हो ।
दुबई अन्तराष्ट्रिय क्रिकेट मैदानमा कोलकाताले दिएको १ सय ९२ रनको लक्ष्यसहित जवाफी ब्याटिङ गरेको राजस्थानले २० ओभरमा ९ विकेट गुमाएर १ सय ३१ रन मात्र बनाउन सक्यो ।
राजस्थानका लागि जोस बट्लरले सर्वाधिक ३५, राहुल टेवाटियाले ३१, बेन स्टोक्सले १८ रन बनाए भने श्रेयस गोपाल २३ रनमा अविजित रहे ।
राजस्थानलाई सस्तैमा समेट्नका लागि कोलकाताका पाट कुमिन्सले ४ विकेट लिए भने वरुण चक्रवर्ती र शिबम माभीले २–२ विकेट लिए ।
यसअघि टस हारेर पहिले ब्याटिङ गरेको कोलकाताले २० ओभरमा ७ विकेट गुमाएर १ सय ९१ रन बनाएको थियो ।
कोलकाताको फराकिलो स्कोरमा इयान मोर्गनले अविजित ६८ रनको अर्धशतकीय इनिङ्स खेले भने राहुल त्रिपाठीले ३९, सुबमन गिलले ३६, आन्द्रे रसेलले २५ र पाट कुमिन्सले १५ रन बनाए ।
राजस्थानका राहुल टेवाटियाले ३ विकेट लिदा कार्तिक त्यागीले २ तथा जोफ्रा आर्चर, श्रेयस गोपालले १–१ विकेट लिए ।
जितसँगै कोलकाताले १४ खेलमा १४ अंक जोडेर प्लेअफ पुग्ने गणितीय सम्भावना कायम राखेको छ । तालिकाको चौंथो स्थानमा उक्लिएको कोलकाताको प्ले अफ यात्रा भने अरुको खेलमा निर्भर हुनेछ ।
