बागमती प्रदेशका मुख्यमन्त्री डोरमणि पौडेलको निवास रहेको क्षेत्रमा २६ करोडको पुल निर्माण गरिने भएको छ । हेटौँडा उपमहानगरपालिका– ११ स्थित हेटौँडा–११ नवलपुर र १२ पदमपोखरी जोड्ने पक्की पुल २६ करोड ४१ लख ८७ हजार लागतमा बन्न लागेको हो ।
भौतिक पूर्वाधार विकास मन्त्रालयको योजनामा निर्माण सुरु गरिएको पुल दुई सय १५ मिटर लम्बाइ र ११ मिटर चौडाइको रहनेछ ।उक्त पुलको शिलान्यास मुख्यमन्त्री पौडेलले मंसिर १८ गते गरेका छन् ।
दुई वर्षभित्र निर्माण सक्ने गरी योजना अघि सारिएको मन्त्रालयले जनाएको छ । पुल निर्माणको ठेक्का एलिट कन्स्ट्रक्सन काठमाडौंले पाएको छ ।मुख्यमन्त्री पौडेलले पुलको शिलान्यास गर्दै बागमती प्रदेश सरकारले अघि सारेका विकासका आयोजनाहरू प्राथमिकताको आधारमा निर्माण गरिने दाबी गरे । उनले प्रदेश सरकारले आफ्नो प्रदेशभित्रका विकासलाई क्रमशः अघि बढाउने हुँदा सबै क्षेत्रबाट सहयोग गर्ने आग्रह गरे । ‘सहरीकरण र समानुपातिक रूपमा प्रदेशभर विकासका आयोजनाहरू प्राथमिकताका आधारमा निर्माण भइरहेका छन्,’ उनले भने, ‘प्रदेश गौरवको आयोजनाको कामहरूसमेत सुरु भइसकेका छन् ।’
