प्रधानमन्त्री एवं नेकपा (एमाले)का अध्यक्ष केपी शर्मा ओलीले पार्टीको केन्द्रीय कार्यालय बनाउन लागिएको भवनको निरीक्षण गरेका छन् । बुधबार थापाथली स्थित नेकपा(एमाले)को केन्द्रीय कार्यालय सार्न लागिएको नयाँ भवनमा प्रधानमन्त्री ओलीले निरीक्षण गरेका हुन् ।
प्रधानमन्त्री ओलीको साथमा अर्थमन्त्री विष्णुप्रसाद पौडेल, कृषि तथा पशुपंक्षी विकास मन्त्री पद्माकुमारी अर्याल लगायतका नेताहरुको पनि उपस्थिति रहेको थियो । नेकपा(एमाले) को कार्यालय थापाथली हाइटस्थित उमंग मार्गमा रहेको सञ्जय अग्रवालको घरमा सर्न लागेको हो ।
साढे २ तलाको उक्त घरमा १३ कोठा रहेको बताइएको छ । हाल नेकपा(एमाले)को केन्द्रीय कार्यालय धुम्बाराहीमा रहेको छ । थापाथलीस्थित उक्त घरमा कार्यालय राख्न पाँच वर्षको लागि सम्झौता भएको र बैशाख १ गते सर्ने बताइएको छ ।
यसैबीच नयाँ पार्टी कार्यालयमा थापाथलीस्थित कार्यालयमा रोबोट राखिएको छ । जसले आगन्तुकको स्वागत गर्ने बताइएको छ । रोबोटले विभिन्न प्रश्नको उत्तर समेत दिने बताइएको छ ।
