रामेछापको मन्थली नगरपालिकामा ६५ किलोमिटर सडक कालोपत्रे भएको छ । मन्थली नगरपालिकाभित्र सङ्घ, प्रदेश र नगरपालिकासमेतको लगानीमा ६४.९७६ किलोमिटर सडक कालोपत्रे गरिएको हाे ।
१४ वटा वडा रहेको नगरपालिकामा स्थानीय तहमा निर्वाचित जनप्रतिनिधि आएपछि सडक पूर्वाधार विकासको कामले गति लिएको हो । मन्थली नगरपालिकाभित्र ३५.९४३ किलोमिटर सडक ग्राभेल तथा सोलिङ गरिएको नगरप्रमुख रमेशकुमार बस्नेतले बताए । उनका अनुसार देवीटार–मन्थली–खुर्कोट करिब २० किलोमिटर सडक कालोपत्रेबाहेक अरू सडक जनप्रतिनिधि निर्वाचित भएर आएपछि कालोपत्रे भएको हो । स्थानीय सरकारकै पहलमा संघ र प्रदेशबाट समेत बजेट ल्याएर काम गरिएकाे उनकाे भनाइ छ ।
नगरप्रमुख बस्नेतले आफूहरू निर्वाचित भएर आएको पाँच वर्षको अवधिमा विभिन्न चुनौतीका बीच धेरै काम भएको भन्दै सार्वजनिक सेवा प्रवाहदेखि भौतिक पूर्वाधार विकाससम्मका काममा धेरै उपलब्धि हासिल भएको दावी गरेका छन् ।
नगरभित्रका मुख्य सडकमध्ये मन्थली–सुनारपानी–सालु, भुत्याखोला–टेकानपुर–कठजोर–ठाँटी, चिसापानी–गेलु–सिक्राल, चिसापानी–पुरानागाउँ, चिसापानी–चनखु, देवीटार–फुलासी, आकाशेपुल–भटौली, मन्थली–भलुवाजोर र मन्थली–सानीमदौ–राहालटार–सालु सडक कालोपत्रे गर्ने कार्य सुरु भई क्रमागत योजनामा परेको छ ।
मन्थलीकाे विकास भिडियाेमा हेर्नुहाेस्
